«Nurly jer»: Aýylda turatyn aqtóbelikter qaladan páter aldy
«Nurly jer» baǵdarlamasynyń «turǵyn úı qurylysy kezinde jeke kompanııalardy yntalandyrý» baǵyty boıynsha salynǵan alǵashqy úı paıdalanýǵa berildi. Ekinshi deńgeıli bankten nesıe alyp, keıin paıyzdyq ústemeaqynyń 7 paıyzyn sýbsıdııalaǵan kompanııa páterlerdi qoljetimdi baǵamen satyp, tapsyrdy.
«Jyl basynan beri óńirde 330 myń sharshy metr turǵyn úı paıdalanýǵa berildi. Bıyl aýmaǵy 630 myń sharshy metr bolatyn myńdaǵan páterdiń kilti tapsyrylady. «Nurly jer» baǵdarlamasy arqyly kezekte turǵan, Turǵyn úı qurylys jınaq bankiniń salymshylaryna páter alý múmkindigi artty. «Nur Aqtóbe» aýdanynda 300-den astam úı salynyp jatyr. Elimizde alǵashqy bolyp memlekettik baǵdarlama aıasynda qoldaý tapqan «Solleres» kompanııasy qurylys jumystary kezinde ekinshi deńgeıli bankten 400 mıllıon teńge aldy. Onyń 7 paıyzy «Damý» qory arqyly sýbsıdııalandy. Bul qurylys kompanııasyna úlken kómek. Qazirgi kúni 54 páterli turǵyn úıdiń teń jartysy Turǵyn úı qurylys jınaq bankiniń salymshylaryna berildi»,- dedi Berdibek Saparbaev.
Bank salymshylary úshin páterdiń ár sharshy metri 140 myń teńgege eseptelgen. Úzbeı aqsha jınaǵan aqtóbelikter aýylda turyp, qaladan páter alyp jatyr.
«Bankke 7 jyldan beri aqsha jınap júrmiz. Búgin eki bólmeli páter aldyq. Kúıeýim muǵalim, ózim medbıkemin. Qazirgi kúni eki balamyz bar. Aqtóbeniń Yrǵyz aýdanynda turamyz. Baspanaly bolǵanymyzǵa qýanyshtymyz»,- dedi Aqgúl Sarına.
Aıta keteıik, Aqtóbe oblysynyń 74 myńǵa jýyq turǵyny Turǵyn úı qurylys jınaq bankiniń salymshysy bolyp tabylady. Qazirgi ýaqytta turǵyn úı qoryn esepke alý sektorynda 14 myńnan astam adam baspana keziginde, 140 myńnan astam adam jer kezeginde tur.