«Nurly jer»: Almatyda tolyq emes 38 otbasy baspanaly boldy

ALMATY. QazAqparat - Almatyda turǵyn úı kezeginde turǵan 38 tolyq emes otbasy «Saıaly-1» shaǵyn aýdanynan baspana aldy, dep habarlaıdy QazAqparat tilshisi.

Olarǵa otbasy quramyna qaraı, 1 nemese 2 bólmeli páterler berildi.

Baspanalar «Nurly jer» memlekettik baǵdarlamasy aıasynda tapsyryldy.

Kiltterdi Almaty ákiminiń orynbasary Muhıt Ázirbaev «Baqytty otbasy» ortalyǵynda tabystady.

«Búgin páterlerin uzaq kútken muqtaj otbasylar qýanyshty sátke jınaldy. Barlyqtaryńyzdy quttyqtaımyn. Bul páterler «Nurly jer» baǵdarlamasy aıasynda berilip jatyr. Sońǵy 3 jylda tolyq emes otbasylar arasynda 2 myńǵa jýyq baspana berilgen. Jyl sońyna deıin osy sanattaǵy taǵy 200 otbasyn qamtý kózdelgen», - dedi Muhıt Ázirbaev.

Almatyda turǵyndarǵa baspana berýdiń keshendi baǵdarlamasy qolǵa alynǵan. «Nurly jer» osy baǵdarlamany júzege asyrýdyń tıimdi tetikteriniń biri bolyp otyr.

Sonymen qatar, kópbalaly jáne muqtaj 44 otbasyǵa páter qunynyń alǵashqy jarnasy retinde 1 mln teńgeden sertıfıkattar berildi.