«Nurly jer»: Aqmola oblysynda myńnan astam otbasy baspanaly boldy

KÓKShETAÝ. QazAqparat – Bıyl Aqmola oblysynda «Nurly jer» memlekettik baǵdarlamasy aıasynda 1348 otbasy qonys toıyn toılady, dep habarlaıdy QazAqparat tilshisi oblystyq ishki saıasat basqarmasyna silteme jasap.

Vedomstvonyń málimetinshe, óńirde jyl basynan beri 151 myń sharshy metr baspana berilip, 1348 otbasy qonys toıyn toılaǵan. Bul kórsetkish boıynsha Aqmola oblysy Nur-Sultan jáne Almaty qalalaryn esepke almaǵanda oblystar arasynda tórtinshi orynda.

«Bıylǵy jyly 570 myń sharshy metr baspana salý josparda bar. Barlyǵy jalǵa beriletin 12 turǵyn úı nemese 506 páter paıdalanýǵa beriledi. Onyń ishinde 172 páter kópbalaly otbasylar men halyqtyń áleýmettik jaǵynan osal toptaryna arnalady. Taǵy 7 turǵyn úı nemese 325 páter nesıeleý arqyly salynady», - oblystyq qurylys basqarmasy basshysynyń orynbasary Elena Ysqaqova.

Vedomstvodan atap ótkendeı, bıylǵy jyly Kókshetaý, Aqkól, Makınsk, Stepnıak, Ereımentaý, Esil, Atbasar, Derjavınsk, Stepnogor qalalary, Tselınograd aýdanynyń Aqmol jáne Qosshy aýyldarynda turǵyn jaǵdaı jaqsara túsedi. Sonymen birge, oblys ortalyǵy, Aqkól, Arshaly, Býlandy, Býrabaı, Esil jáne Zerendi aýdandarynda kóppáterli turǵyn jáne jeke úılerge ınjenerlik-kommýnıkatsııalyq ınfraqurylym qurylysy boıynsha 15 jobany júzege asyrý josparlanǵan. Budan bólek, Kókshetaý qalasy men Aqkól aýdanynda 661 jer telimine sý jáne elektr jelisi tartylatyn bolady.