Nurly jer: Aqmola oblysynda 464,7 myń sharshy metr baspana beriledi

KÓKShETAÝ. QazAqparat - Bıyl Aqmola oblysynda «Nurly jer» baǵdarlamasy aıasynda 464,7 myń sharshy metr baspanany paıdalanýǵa berý josparlanýda. Bul týraly apparat májilisinde oblystyq qurylys basqarmasynyń basshysy Marat Áýbákirov aıtty, dep habarlaıdy QazAqparat tilshisi ákimdiktiń baspasóz qyzmetine silteme jasap.

Basqarma basshysynyń aıtýynsha, «Nurly jer» turǵyn úı qurylysy baǵdarlamasy qolǵa alynǵannan beri oblysta barlyǵy 426 myń sharshy metr turǵyn úı paıdalanýǵa berilgen, 8 shaqyrym ınjenerlik jeli jóndelgen. Aǵymdaǵy jyly turǵyn úı qurylys jınaq júıesi esebinen jaldamaly jáne nesıe arqyly beriletin baspanalardy salý josparda bar. Bıylǵy jyldyń alǵashqy bes aıynda barlyǵy 212 myń sharshy metr turǵyn úı qoldanysqa berildi.

«Bıylǵy jyly jalpy aýmaǵy 29 myń sharshy metr jaldamaly 14 turǵyn úıdi paıdalanýǵa berý josparlansa, «Nurly jer» baǵdarlamasy boıynsha aýmaǵy 464,7 myń sharshy metr baspana mejelenip otyr», - dedi Marat Áýbákirov.

«Jekemenshik turǵyn úı qurylysyn damytý» baǵyty sheńberinde 14 eldimekende ınjenerlik ınfraqurylymy bar jer telimderi ázirlenedi. Qurylys jobasyn júzege asyrý barysynda 2,5 myń jer telimi ınfraqurylymmen qamtamasyz etiledi. Bul kezektiń ilgeri jyljýyna biraz septigin tıgizedi. Jekemenshik qurylysshylarǵa jekeleı úılerdi salýǵa basymdyq berilýde.  Aqmola oblysy ákimdigi janyndaǵy óńirlik úılestirý keńesi tarapynan bıylǵy jyly quny 1,7 mıllıard teńgege 5 jobany sýbsıdııalaý qoldaý tapty.

Baǵdarlamany odan ári júzege asyrý úshin ınjenerlik-kommýnıkatsııalyq ınfraqurylym jáne jaldamaly turǵyn úı salý boıynsha jalpy quny 11,4 mıllıard teńge bolatyn 3 jyldyq jospar (2019-2021 jyldarǵa arnalǵan) bekitildi.

Oblys basshysy aýdan jáne qala ákimderine «Nurly jer» turǵyn úı qurylysy baǵdarlamasy sheńberinde salynyp jatqan turǵyn úılerdiń qurylysyn aıaqtap, ınjenerlik-kommýnaldyq ınfraqurylymdarǵa qarastyrylǵan qarjynyń ýaqytyly bólinýin qamtamasyz etýdi tapsyrdy.