Nurlyhan Sharhan: Olımpıadada aıanyp qalmaımyz
Keıingi jyldary elimizde dzıýdo sportynan Nurlyhan Sharhan esimdi sportshynyń esimi ókpke jaqsy tanylyp keledi. Kóptegen jarysta el namysyn abyroımen qorǵaǵan balýan óziniń qabilet-qarymyn taǵy bir márte dáleldeýge múmkindik alyp otyr.
Nurlyhan Sharhan 2000 jyly 18 sáýirde Qyzylorda qalasynda dúnıege kelgen. Ol – dzıýdo kúresinen halyqaralyq dárejedegi sport sheberi.
2023 jyly Hanchjoý qalasynda Azııa oıyndarynyń qola júldesin aldy. Sondaı-aq sol jyly Azııa oıyndarynda jáne Parıjdegi «Grand Slam» týrnırinde úzdik úshtikte boldy. 2022 jyly Azııa chempıonatynda qola medal aldy. Elimizdiń birneshe dúrkin jeńimpazy jáne júldegeri bolǵan.
«Dzıýdo – álemdegi tanymal sport túriniń biri sanalady. Men onyń álippesin úırengen sátten bastap jeńiske jetý jolynda ter tógip kelemin. Bar bilgenimdi osy Parıj Olımpıadasynda kórsetkim keledi. Sondyqtan tórtkúl dúnıe júzi halqy kóz tikken baıraqty básekede aıanyp qalmaımyz», - dedi Nurlyhan Sharhan.
Onyń jeke bapkeri Qalen Qalıuly shákirtiniń daıyndyǵy jaqsy ekenin aıtady. Olımpıadaǵa ázirlik barysyna basa nazar aýdarylǵan.
«Parıj Olımpıadasyna eki shákirtim barady. Onyń biri – Abylaıhan Jubanazar bolsa, ekinshisi – Nurlyhan Sharhan. Olar talaı márte baıraqty básekelerde baq synap, sheberligin shyńdap, mol tájirıbe jınaǵan sportshylar. Olımpıadada ekeýin zor senim artamyn», - deıdi ol.
Sondaı-aq Parıj Olımpıdasynda Syr óńirinen boksshy Qamshybek Qońqabaev pen grek-rım kúresiniń sheberi Aıdos Sultanǵalı baq synaıdy.
Frantsııa astanasy Parıj qalasynda Jazǵy Olımpıada oıyndary 26 shilde men 11 tamyz aralyǵynda ótedi. Dúbirli dodaǵa álemniń 205 elinen 10 500 sportshy qatysady dep josparlanyp otyr. Onda 32 sport túrinen 329 medal jıyntyǵy sarapqa salynady.
Aıta ketsek, búgin 2024 jylǵy Parıj Olımpıadasy saltanatty túrde ashylady.