Nurlan Orazalın: Aşy da bolsa shyndyqty aıtý - paryz

ASTANA. QazAqparat - Astanada «Alash» partııasynyń qurylǵanyna 100 jyl tolýyna oraı «Rýhanı jańǵyrý: Alash jáne Azattyq ıdeıasynyń sabaqtastyǵy» atty halyqaralyq konferentsııada Qazaqstan Jazýshylar odaǵynyń tóraǵasy, qoǵam qaıratkeri Nurlan Orazalın Alash qozǵalysynyń dáýirine erekshe baǵa berdi, dep habarlaıdy «QazAqparat»HAA tilshisi.

QR Jazýshylar odaǵynyń tóraǵasy konferentsııada «Ult zııalarynyń ıgilikti isteri» atty baıandama oqydy.

«Osy kúndi saǵyna kútken qazaq jurtynyń atynan uly merekemen barlyqtaryńyzdy quttyqtaýǵa ruqsat etińizder. HH ǵasyr - órti men derti, óksigi men serti qatar órbigen ǵasyr. Bul ǵasyrdyń eki túrli órkenıet pen mádenıettiń óliara tusynda Uly Dala jurtyn qandaı qıyndyqtarǵa uryndyrǵany belgili. Alashorda úkimeti, Alash qozǵalysy  degen aıryqsha atpen engen osy bir kıeli de qasıetti uǵymdar tóńireginde halyqqa esepsiz qyzmet etýdi úlgiledi. Alashtaný deıtin tarıh ǵylymynyń páni retinde tarıh aıasynan shyǵyp ketip, dáýirtaný, ǵasyrtaný, ulttaný, urpaqtaný sekildi keńistike aınaldy. Bul ulttyń ózin-ózi tanýǵa bet burǵanynyń nysany», - deıdi qoǵam qaıratkeri.

Nurlan Orazalın óz sózinde «Eger biz memleket bolǵymyz kelse, onda halyq rýhanııatynan bastaýymyz kerek», degen Tuńǵysh Prezıdenttiń sózin keltire ketti.

«Ras, 1917-1920 jylǵa deıingi aralyqta qazaqtyń ulttyq rýhy aýyr kezeńde boldy. Qazaqtarǵa óz memleketin qurý úmiti oıana bastaǵan kezde kósh basyna Alash serkeleri - Álıhan Bókeıhanuly, Ahmet Baıtursynuly, Mirjaqyp Dýlatuly jáne taǵy basqa qaıratkerler shyqty», -deıdi ol.

Nurlan Orazalın Alash qaıratkerleriniń árqaısysynyń eńbegine erekshe toqtaldy.

«Aşy da bolsa, shyndyqty aıtý - paryz. Túrmede jatyp, Ortalyq komıtetke ashyq hat jazbaǵanda otyzǵa jańa tolǵan jas jazýshy, qazaq atyn álemge tanytqan Muhtar Áýezovtiń de súıegi qaı jerde, qaı saıda qalary belgisiz edi. Ataqty «Abaı joly» jazylmas edi. Prezıdentimiz usynǵan Ulttyq memleket sóziniń balamasyna aınalǵan Uly Dala eli atty ondaǵan ǵasyrlardy baýyryna basqan qanatty uǵym búgingi tańda aınalymǵa erkin enip ketti. Ulttyq kodyńdy saqtaı bil degen sózge basa nazar aýdarý kerek», - deıdi Nurlan Orazalın.

Eske sala ketsek, búgin Astanadaǵy EKSPO Kongre ortalyǵynda «Alash» partııasynyń qurylǵanyna 100 jyltolýyna oraı «Rýhanı jańǵyrý: Alash jáne azattyq ıdeıasynyń sabaqtastyǵy» atty halyqaralyq ǵylymı-tájirıbelik konferentsııa ótip jatyr.