Nurlan Nyǵmatýlın: Jumysshynyń áleýmettik qorǵalýyna jańa múmkindikter qamtylady

NUR-SULTAN. QazAqparat – Búgin Májilis spıkeri Nurlan Nyǵmatýlınniń tóraǵalymen jalpy otyrys ótti. Onda depýtattardyń bastamasymen ázirlengen qaryzdyq eńbekti retteýge qatysty zań jobasy birinshi oqylymda maquldandy, dep habarlaıdy QazAqparat tómengi palatynyń baspasóz qyzmetine silteme jasap.

Qujat qaryzdyq eńbek salasynda eńbek etýshi azamattardy áleýmettik qorǵaýǵa, sondaı-aq jumys berýshiler tarapynan olardyń eńbek úshin syıaqy alý quqyǵy saqtalýyn, eńbek jaǵdaılaryn qaýipsizdik jáne gıgıena talaptaryna sáıkes qamtamasyz etýge baǵyttalǵan.

Zań jobasyn talqylaý barysynda Májilis Tóraǵasy Nurlan Nyǵmatýlın: «Qaı kezeńde de eńbek máselesi óte mańyzdy. Sondyqtan bul salany árqashanda zań deńgeıinde qorǵaý úshin der kezinde naqty qadamdar jasalyp keledi. Sonyń biri búgingi biz maquldaǵan zań jobasy. Osy qujatta qaryzdyq eńbekti retteý degen normalar engizildi. Bul azamattardy jumyspen qamtý jáne olardyń áleýmettik jaǵdaıyn saqtaý jolynda taǵy bir jańa múmkindik deýge bolady», - dep atap ótti.

Sonymen qatar osy Eńbek kodeksinde qabyldaýshy jáne jiberýshi taraptar jumyskeriniń quqyqtary men mindetteri eskerilgen. Máselen, qabyldaýshy tarap jumyskerleriniń negizgi jalaqysynan tómen emes jalaqy mólsherin retteıtin normalarmen tolyqtyrý usynylǵan. Sondaı-aq, qaryzdyq jumyskerdiń eńbek qyzmeti ýaqytyndaǵy jazataıym oqıǵalar kezindegi tergep-tekserý tártibin jáne personaldy berý jónindegi qyzmetterdi kórsetý boıynsha qyzmetti júzege asyrý tártibin retteıtin normalar qarastyrylǵan.