Nurlan Nyǵmatýlın: járdemaqyny taǵaıyndaý proaktıvti túrde júzege asyrylýy kerek

NUR-SULTAN. QazAqparat - Búgin Parlament Májilisiniń jalpy otyrysynda depýtattar azamattardyń jekelegen sanattaryn áleýmettik qorǵaý týraly zań jobasyn maquldady. Qujatta 7 men 16 jas arasyndaǵy múgedek balalardy qaıta qarap, kýálik berý máselesi kózdelgen, dep habarlaıdy QazAqparat tómengi palatanyń baspasóz qyzmetine silteme jasap.

Májilis Tóraǵasy Nurlan Nyǵmatýlınniń pikirinshe, endi ata-analar balalarynyń múgedektigin dáleldeý úshin kabınet jaǵalap, qujat jınamaı, tsıfrlyq tehnologııanyń tıimdiligin qoldaný qajet. Balalardyń múgedektik sanatyn anyqtaý rásimi jeńildetilgen jáne proaktıvti túrde júrgizý kerektigin aıtqan Nurlan Nyǵmatýllın Eńbek jáne halyqty áleýmettik qorǵaý mınıstrligin Densaýlyq saqtaý mınıstrligimen birlesip, is-qımyl josparyn jasaý qajettigine nazar aýdardy. Onyń aıtýynsha, ata-analar tarapynan narazylyq boldyrmaý úshin aqparattyq júıelerdiń barlyq ıntegratsııalyq protsesterin tez aıaqtap, barlyq qol jetimdi tsıfrlyq tehnologııalardy qoldaný tıis. Sondaı-aq, Májilis Tóraǵasy osynyń barlyǵyn halyqqa durys túsindirý kerektigin aıtyp, ol úshin tıisti zańnamalyq sharalar qabyldanǵanyn jetkizdi. Aıta ketý kerek, Zań jobasynda 1-toptaǵy múgedekterge kútim jasaıtyn adamdarǵa 1,4 eń tómen kúnkóris deńgeıi mólsherinde járdemaqy engizý; múgedek balalarǵa múgedektigi boıynsha jáne asyraýshysynan aıyrylý jaǵdaıy boıynsha járdemaqylardy bir mezgilde alý quqyǵyn berý, bul múgedek balalary bar jáne asyraýshysynan aıyrylǵan otbasylardyń kirisin arttyrýǵa múmkindik beredi (norma 2 myńnan astam adamǵa áser etedi); sondaı-aq, múgedek bala tárbıelep otyrǵan otbasylarǵa memlekettik turǵyn úı qorynan turǵynjaı alý kezektiligin bala 18 jasqa tolǵan jaǵdaıda da saqtaý kózdeledi.