Nurlan Nyǵmatýlın Ulttyq ekonomıka mınıstrine: Ózderińizge de joǵary talap qoıyńyzdar
«Qazaqstan Respýblıkasynyń keıbir zańnamalyq aktilerine Qazaqstan Respýblıkasyndaǵy kásipkerlik qyzmet salasynda jańa retteýshilik saıasatty engizý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqylaý kezinde ınternet nashar eldi mekenderde kásipkerlik sýbektileri esepter men habarlandyrýdy elektrondy nusqada bere almasa qandaı qadamdar jasalatyny suraldy.
«Depýtattar aqparattyq tetikter talaptaryn oryndaýdy qaǵaz jáne elektrondy nusqada saqtaý múmkindigi týraly túzetý engizidi. Depýtattardyń túzetýi boıynsha sizdiń kózqarasyńyz qandaı?», - dep surady depýtat Vera Kım.
Óz kezeginde Ulttyq ekonomıka mınıstri Áset Erǵalıev depýtattar usynysyn qoldaıtynyn aıtty.
«Esepterdi tapsyrý formasy qaǵaz ári elektrondy nusqada bolýy kerek dep sanaımyz. Eger sapaly ınternet qoljetimdi bolmasa, onda kásipker eseptilikti qaǵaz nusqada da tapsyra alýy kerek», - dedi mınıstr.
Osy turǵyda Májilis tóraǵasy Nurlan Nyǵmatýlın zań jobasyn pysyqtaý kezindegi mınıstrlik men «Atameken» palatasynyń bul baǵyttaǵy qadamdaryn synǵa aldy.
«Sony Parlamentke kelip túsindińiz be? Búgin eseptiliktiń eki formasyna qatysty depýtattardyń pozıtsııasyn qoldap otyrsyzdar. Zań jobasy daıyndalǵan kezde nege tek elektrondy nusqany qaldyrý kerektigin qoldadyńyzdar?! Bul neǵylǵan pozıtsııa, kásipkerler múddesin qorǵamaı palata qaıda qarap otyr? Kásipkerler nashar ınternetimen eseptilikti qalaı júrgizedi? Árıne, tsıfrlyq eseptilikke kóshý talaby eshqandaı kúmán týdyrmaıdy, biraq bul baǵytta tıisti daıyndyq kerek. Eń aldymen, barlyq eldi mekender turaqty ınternetke qol jetkizip alýy tıis. Eger sapaly ınternet bolmasa, tolyqtaı tsıfrly eseptilikke kóshý problema týdyratyny túsinikti ǵoı. Interneti nashar aýyldar bar ekeni belgili. Ekinshiden, keıbir kásipkerler elektrondyq nusqada eseptilikti tapsyrýǵa daıyn emes shyǵar. Mysaly, aýyldaǵy shaǵyn dúkendi alsaq, ol dúkende bir ǵana adam jumys isteıdi. Onyń ıesi de, satýshysy da, býhgalteri de sol kisi. Eger onyń elektrondy tehnıkasy bolmasa, tsıfrly qujattarmen qalaı jumys isteıdi. Al endi mınıstrlik usynysyna qarasaq, osy eseptilikti ýaqytyly tapsyrmasa, atalǵan kásipker jaýapkershilikke tartylady», - dep toqtaldy Májilis tóraǵasy.
Osy oraıda N. Nyǵmatýlın aýyldarǵa sapala ınternet jetpese, eseptiliktiń qaǵaz nusqasynan bas tartyp, tek elektrondy nusqany engizý dúrbeleń týdaratynyn aıtty.
«Mınıstr myrza, osyndaı qujatty ázirlep, Parlamentke engizgen kezde neni oılaısyzdar?! Eger kásipkerlerge osyndaı talaptardy engizseńizder, onda ózderińizge de joǵary talap qoıyńyzdar. Aldaǵy ýaqytta barsha eseptilik tsıfrlyq sıpatta bolatynyn jaqsy túsinemiz jáne osy formatty qoldaımyz. Degenmen tıisti jaǵdaı jasaý kerek. Tek osydan keıin bul formatqa kóshken jón», - dedi Májilis tóraǵasy.
Talqylaýdan keıin, zań jobasyn ekinshi oqylymǵa deıin qaraý kezinde tıisti qadamdardy pysyqtaý tapsyryldy.