Nurlan Nyǵmatýlın: Sýdy paıdalanýdy baqylaý júıesi qarastyrylýy tıis

NUR-SULTAN. QazAqparat - Búgin Májilis Spıkeri Nurlan Nyǵmatýlınniń tóraǵalyǵymen ótken jalpy otyrysta depýtattar energııa únemdeý jáne energııa tıimdiligin arttyrý máselelerine qatysty zań jobasyn birinshi oqylymda maquldady. Bul týraly QazAqparat Májilistiń baspasóz qyzmetine silteme jasap habarlaıdy.

Bul zań jobasynyń negizgi maqsaty - jalpy ishki ónimniń energııa syıymdylyǵyn tómendetý boıynsha energııa únemdeý jáne energııa tıimdiligin arttyrý salasyndaǵy júrgiziletin saıasattyń túpki nátıjesine qol jetkizý.

Májilis Tóraǵasy Nurlan Nyǵmatýlın zań jobasy sý paıdalanýdy baqylaý júıesin qarastyrýy tıis ekenin atap ótip, jumys tobyna ekinshi oqylymǵa deıin ázirleýshilermen birlesip osy máseleni pysyqtaý qajettigin aıtty.

Nurlan Nyǵmatýlınniń pikirinshe, Indýstrııa jáne ınfraqurylymdyq damý mınıstrligi zań jobasynan tıisti normalardy alyp tastaý usynysy ónerkásiptik kásiporyndardyń, kommertsııalyq jáne bıýdjettik uıymdardyń sýdy qalaı paıdalanatynyn baqylaýǵa múmkindik bermeıdi.

Sondyqtan Nurlan Nyǵmatýlın depýtattardyń qoldanystaǵy sý tutynýdy baqylaý júıesin saqtaý qajettiligi týraly túzetýlerin qoldaý kerektigin atap ótti.

Jalpy, zań jobasymen ekspress-energoaýdıt jáne maqsatty energoaýdıt engiziledi. Nysanǵa barmaı aldyn alý baqylaý tártibi bekitiledi. Sonymen qatar, oblystardyń, respýblıkalyq mańyzy bar qalalardyń jáne astananyń jergilikti atqarýshy organdarynyń quzyreti energııa únemdeý jónindegi jol kartalaryn ázirleý jáne bekitý jónindegi normamen tolyqtyrylady.