Nurlan Nyǵmatýlın: Prezıdent Joldaýyn zańnamamen tolyq qamtamasyz ettik

NUR-SULTAN. QazAqparat – Prezıdent Joldaýyndaǵy bastamalar zańnamalyq turǵyda tolyqtaı qamtamasyz etildi. Bul týraly Parlament Májilisiniń tóraǵasy Nurlan Nyǵmatýlın málim etti, dep habarlaıdy QazAqparat tilshisi.

«Birneshe kúnnen keıin biz jańa 2020 jyldy qarsy alatyn bolamyz. Jańa jyl árqashan da ótkenge esep berip, bolashaqqa zor úmit jáne senim arttyratyn erekshe kezeń. Árıne, bizdiń kezekti sessııamyz aıaqtalǵan joq. Biraq ótken tórt aıda atqarylǵan jumystarǵa toqtalatyn bolsaq, biz 30-dan astam zań jobasyn qarap, maquldadyq. Onda eń aldymen, halqymyzdyń ál-aýqatyn kúsheıtýge erekshe nazar aýdaryldy. Sonyń arqasynda tikeleı áleýmettik-ekonomıkalyq mańyzy bar birqatar zańdar qabyldanyp, ony júzege asyrý úshin naqty qadamdar jasaldy», - N. Nyǵmatýlın Parlament Májilisiniń jalpy otyrysynda.

Osy oraıda bul jolda Elbasy Nursultan Nazarbaev belgilep bergen strategııalyq bastamalar basshylyqqa alynǵanyn, sondaı-aq sessııanyń ashylýynda QR Prezıdenti Qasym-Jomart Toqaev alǵa qoıǵan maqsattar basym baǵyt bolǵanyn atap ótti.

«Aldaǵy jyly da bastalǵan jumysty jalǵastyratyn bolamyz. Osy sessııa bastalǵaly Májilis 77 zań jobasyn jumysqa aldy. Biz Memleket basshysy Qasym-Jomart Toqaevtyń Joldaýyn júzege asyrýǵa baǵyttalǵan barlyq zań jobalaryn ýaqytyly maquldadyq. Osy arqyly Prezıdent Joldaýyn zańnamalyq qoldaýdy tolyqtaı qamtamasyz ettik», - dedi Májilis tóraǵasy.

Belgili bolǵandaı, Májilis bıýrosy sheshimine sáıkes, depýtattardyń óńirlerge saparlary 2020 jylǵy 5-14 qańtar aralyǵynda ótedi.