Nurlan Nyǵmatýlın men Mustafa Shentop parlamentaralyq is-qımyldy damytýdy talqylady

NUR-SULTAN. QazAqparat - Májilis Spıkeri Nurlan Nyǵmatýlın Eýrazııa elderi Parlamentteri spıkerleriniń 4-keńesi qarsańynda Túrkııa Uly Ulttyq Jınalysynyń tóraǵasy Mustafa Shentop bastaǵan delegatsııa ókilderimen kezdesti, dep habarlaıdy QR Parlamenti Májilisiniń baspasóz qyzmeti.

Bul kezdesý ekijaqty, sonyń ishinde, parlamentaralyq is-qımyldy damytý máselelerin talqylaýdyń erekshe múmkindigi. Májilis tóraǵasy atap ótkendeı, Túrkııa Qazaqstan úshin tarıhy, mádenıeti, rýhanı qundylyqtary ortaq baýyrlas memleket bolýmen qatar, strategııalyq áriptes el.

Táýelsizdik alǵan kúnnen bastap Qazaqstannyń Tuńǵysh Prezıdenti Nursultan Nazarbaev pen Túrkııa Prezıdenti Redjep Taııp Erdoǵannyń ózara túsinistigi men dostyǵyna negizdelgen salıqaly saıasattyń arqasynda bizdiń elderimiz kópjaqty yntymaqtastyqtyń joǵary deńgeıine kóterildi. Qazirgi ýaqytta Qazaqstan Prezıdenti Qasym-Jomart Toqaev osy baǵytty odan ári júıeli túrde jalǵastyrýda.

Óz kezeginde Mustafa Shentop arnaıy shaqyrýǵa alǵysyn jetkize kelip, Qazaqstannyń qarqyndy damý deńgeıine joǵary baǵa berdi. Jáne Túrkııa Prezıdentiniń bizdiń elmen áriptestikke árqashanda zor kóńil bóletinin, Qazaqstannyń árbir jetistigi maqtanysh ekenin atap ótti. Taraptar parlamentaralyq yntymaqtastyqty damytý jolynda belsendi jumys atqarý kerektigine toqtaldy.