Nurlan Nyǵmatýlın: Májilistegi jumys meniń ómirimdegi mańyzdy jáne jaýapty kezeń boldy
Osyǵan baılanysty Májilis tóraǵasy Memleket basshysy Qasym-Jomart Kemeluly Toqaev asa mańyzdy mindetter júktegenin alǵa tarta kelip, ol maqsattarǵa jetý úshin kadr salasyn jańartý kerek ekenine toqtaldy, dep habarlaıdy QazAqparat QR Parlamenti Májilisiniń baspasóz qyzmetine silteme jasap.
Otyrys barysynda QR Konstıtýtsııasynyń 58-babynyń 2-tarmaǵyna sáıkes, Nurlan Zaırollauly Nyǵmatýlın Qazaqstan Respýblıkasynyń Parlament Májilisi tóraǵasynyń qyzmetinen óz erkimen bosatý týraly qaýlynyń jobasyn daýysqa qoıyp, ol biraýyzdan qabyldandy. Mańyzdy sheshim qabyldaǵanyn alǵa tartqan Nurlan Nyǵmatýlın óz sózinde:
- Bıyl Májilis Spıkeri bolǵanyma 10 jyl tolyp otyr. Úsh shaqyrylym tóraǵa boldym. Bul, árıne, az ýaqyt emes. Osy ýaqyttyń ishinde, elimizdiń saıası jáne áleýmettik-ekonomıkalyq ómirine belsene aralasyp, elimizge, halqymyzǵa qajetti, sapaly zańdar qabyldaý jolynda birlesip, aıanbaı eńbek ettik. Bul jolda, eń aldymen, Elbasymyz, «Nur Otan» partııasynyń negizin qalaýshy Nursultan Ábishuly Nazarbaevqa, qazirgi Memleket Basshysy, partııamyzdyń Tóraǵasy Qasym-Jomart Kemeluly Toqaevqa maǵan osy jyldarda birneshe laýazymdy qyzmetti senimmen tapsyryp, árqashanda qoldaý kórsetkeni úshin, shyn júrekten alǵysymdy bildiremin, - dedi.
Odan ári Nurlan Nyǵmatýlın úsh shaqyrylym birge jumys istegen barlyq depýtattarǵa osy jyldar ishinde qoldap, senim bildirgen saılaýshylarǵa, Májilistiń zań shyǵarý jumysyn joǵary deńgeıde qamtamasyz etken apparat qyzmetkerlerine, barlyq qoǵamdyq uıym ókilderine, Májiliske kirmegen saıası partııalarǵa, Májilis jumysyn nasıhattaǵan jýrnalısterge, sarapshylarǵa alǵys bildirdi.