Nurlan Nyǵmatýlın Mádenıet jáne sport mınıstrligin ne úshin synady

NUR-SULTAN. QazAqparat - Parlament Májilisinde «QR Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasy qaralyp, onyń aıasynda ákimshilik quqyq buzýshylyq aıyppuldary mólsherin tómendetý eskerilgen. Alaıda sporttaǵy zańsyzdyqtar úshin jazany jeńildetý usynysy depýtattardyń narazylyǵyn týdyrdy, dep habarlaıdy QazAqparat tilshisi.

Jalpy otyrysta depýtat Záýresh Amanjolova barsha álemde taza sport máselesine erekshe nazar aýdarylǵanyn atap ótti. Osy oraıda dopıngpen, aldyn ala kelisilgen jarystarmen kúres, jarystardyń tyıym salynǵan tásilderine tosqaýyl qoıý eskerilgen.

«Jaqynda Májiliste Úkimet engizgen dene shynyqtyrý jáne sport máseleleri boıynsha zań jobasyn qarastyrǵan bolatynbyz, bul qujat taza emes sporttyq jeńisterge tosqaýyl qoıady. Bul turǵyda sportshylardyń, bapkerlerdiń, sondaı-aq jarystardy uıymdastyratyndardyń jaýapkershiligin kúsheıtýge qatysty túzetýler engizilip otyr. Al búgin qarastyrylyp otyrǵan zań jobasy sportshylar men jarys uıymdastyrýshylaryn paraǵa jyǵý áreketi úshin aıyppul kólemin 200-den 100 AEK-ke deıin tómendetýdi usynýda. Sonymen qatar, osy quqyq buzýshylyqtar úshin ákimshilik qamaýǵa alýǵa tyıym salynbaq», - dedi depýtat.

Z. Amanjolova bul baǵyttaǵy qadamdardyń biryńǵaı bolýy kerektigin atap ótti.

Óz kezeginde Májilis tóraǵasy Nurlan Nyǵmatýlın bir aı buryn dopıngten bastap, sporttaǵy ózge de máselelerdi retke keltirý egjeı-tegjeıli talqylanǵanyn eske saldy.

«Sol ýaqytta sizderdiń málimdemelerińiz durys boldy. Bir aı buryn qur sózden, bos deklaratsııadan iske kóshý kerektigin aıtqan edim. Ókinishke qaraı, endi búgingi jaǵdaı mınıstrlik (Mádenıet jáne sport mınıstrligi-avt.) tek málimdemeden asa almaı turǵanyn baıqap turmyz. Sport máselesin talqylaǵan kezde, sportta tyıym salynǵan tásildermen jeńiske jetý qadamdaryna tosqaýyl qoıý, onymen kúresý týraly úndeý jasaǵan edińizder. Al búgin osynda qaralyp zań jobasynda ádil emes jarystar úshin jaýapkershilikti tómendetýdi qarastyratyn usynys eskerilgen. Bul máselede júıelilik, birizdilik qaıda? Taza sporttyń jetistikter úshin kúres qaıda? Osyndaı jumys úshin uıalý kerek qoı», - dedi N. Nyǵmatýlın Mádenıet jáne sport mınıstrligi ókilderine qarata aıtqan sózinde.

Bul turǵyda Mádenıet jáne sport vıtse-mınıstri Erlan Qojaǵapanov vedomstvoda atalǵan tarmaqshany qaıta qarastyratynyn, sondaı-aq ádiletsiz jarystar úshin jazany kúsheıtý normasy da engizilýi múmkin ekenin aıtty.

«Mınıstrlikte bul jaǵdaıdy tekserip, jańa usynysty (jazany tómendetý boıynsha) pysyqtamaı ótkizip jibergen adamdy anyqtap, jaýapkershilikke tartamyz. Bul turǵyda osy normadaǵy jazany kúsheıtip, qylmystyq jaýapkershilik te engizilýi múmkin», - dedi vıtse-mınıstr.