Nurlan Nyǵmatýlın Qordaıda kóz jumǵan marqumdardyń týystaryna kóńil aıtty

NUR-SULTAN. QazAqparat - QR Parlamenti Májilisiniń tóraǵasy Nurlan Nyǵmatýlın Qordaıdaǵy jappaı tóbeleste qaza tapqan marqumdardyń jaqyndaryna kóńil aıtty, dep habarlaıdy QazAqparat.

«Qordaıda qaza bolǵandardyń otbasyna kóńil aıtamyn jáne zardap shekkenderdiń saýyǵýyn tileımin. Jaǵdaı el basshylyǵynyń baqylaýynda. Bir top májilismender úkimettik komıssııamen birge oqıǵa ornynda jumys isteýde. Bizdiń maqsatymyz arandatýǵa jol bermeı, turaqtylyqty saqtaý» dep jazdy Májilis tóraǵasy Twitter paraqshasynda.

Eske sala keteıik, keshe Jambyl oblysy Qordaı aýdanyndaǵy Masanchı aýylynyń turǵyndary arasynda jappaı tóbeles boldy. Kóp ótpeı Prezıdent Qasym-Jomart Toqaev Jambyl oblysy Qordaı aýdanynda bolǵan jappaı tóbeleske qatysty pikir bildirgen-di.

«Jambyl oblysy Qordaı aýdanynda buzaqylyq sıpattaǵy jappaı tóbeles boldy. Ony arandatýshylar óz paıdasyna qoldanbaq bolǵan. Polıtsııa jaǵdaıdy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady» dep jazdy Qasym-Jomart Toqaev Twitter paraqshasynda.

Al búgin Memleket basshysy Jambyl oblysyndaǵy oqıǵaǵa baılanysty málimdeme jasady.