Nurlan Nyǵmatýlın Qatar elshisimen kezdesti
Kezdesýde elder arasyndaǵy yntymaqtastyqty odan ári damytýdyń mańyzdy máseleleri talqylandy. N. Nyǵmatýlın Qatar Qazaqstannyń mańyzdy seriktesi ekenin alǵa tarta kelip, áriptestikti odan ári belsendi túrde tereńdetý qajettiligine toqtaldy. Eki el arasynda dıplomatııalyq qarym-qatynas ornaǵan 26 jyl ishinde, Qazaqstan men Qatar kóp baǵytty áriptestikti nyǵaıtýda joǵary tabystarǵa qol jetkizdi.
Taraptardyń aıtýynsha, ol eki memleket basshylarynyń ózara túsinistik pen dostyq nıetke negizdelgen tıimdi jumystarynyń nátıjesi.
Nurlan Nyǵmatýlınniń pikirinshe, Qazaqstan men Qatardyń saýda-ekonomıkalyq áleýeti óte zor. Osyǵan oraı, N. Nyǵmatýlın Qatar kásipkerlerin Qazaqstandaǵy qarjy salasy, aýyl sharýashylyǵy, kólik-logıstıkalyq, týrıstik ınfaqurylymdardy damytý boıynsha ınvestıtsııalyq jobalarǵa qatysýǵa shaqyrdy.
Óz kezeginde Ahmed ben Álı Ál-Tamımı myrza, Qatar Ámiri Qazaqstan Prezıdenti Nursultan Nazarbaevtyń árbir bastamasyna asa qurmetpen qaraıtyndyǵyn jáne eki el arasyndaǵy qatynasty damytýǵa árqashanda yntaly ekenin jetkizdi. Sondaı-aq, Qatar memleketi saıası, ekonomıkalyq basqa da baǵyttarda qoldaý kórsete otyryp, qos memleketke tıimdi jobalardyń barlyǵyna qatysýǵa daıyn ekendigin bildirdi.
Odan ári kezdesý ıeleri halyqaralyq jáne parlamentaralyq yntymaqtastyq jaıyn sóz etti. Palata Spıkeri ekijaqty qarym-qatynasty nyǵaıtýda parlamentaralyq yqpaldastyqtyń róli zor ekenin aıtyp yntymaqtastyq jónindegi toptar men beıindi komıtetter arqyly ózara saparlar praktıkasyn engizý qajettigin, ol zańnama salasynda jan-jaqty tájirıbe almasýǵa múmkindik beretinine toqtaldy.