Nurlan Nyǵmatýlın: Aýdan ákimdikterine deıin jańa monopolııa qurýǵa múmkindik bermeý kerek

NUR-SULTAN. QazAqparat – Májilis Tóraǵasy Nurlan Nyǵmatýlın bıznes-ahýaldy jaqsartý máseleleri boıynsha jańa zań jobasynan básekelestik ortasyn jetildirýge kedergi keltiretin normalardy alyp tastaýdy tapsyrdy, dep habarlaıdy QazAqparat tilshisi.

«Keıingi kezde otandyq naryqta básekelestik ortasy aıtarlyqtaı nasharlap ketti. Búgingi kúni AQ pen JShS sekildi 24 kásiporyn túri monopolııalyq túrde baǵany retteý máselesin qolǵa alyp alǵan. Bul kerek deseńiz Úkimet otyrysynda da jeke talqylanatyn máselege aınaldy. Osy jyldyń qańtar aıyndaǵy Úkimettiń keńeıtilgen otyrysynda Prezıdent naryqtaǵy memlekettik qana emes, jeke kásiporyndardyń da monopolııasyn erekshe atap ótip, demonopolızatsııa boıynsha naqty tapsyrmalardy bergen edi. Al sizder ne usynyp otyrsyzdar? Sizder oǵan qarsy usynystardy engizdińizder», - dedi Nurlan Nyǵmatýlın Úkimet basshysynyń orynbasary- Qarjy mınıstri Álıhan Smaıylovqa qarata aıtqan sózinde.

Májilis Tóraǵasy jańa zań boınysha naryq sýbektilerine konkýrstyq tártip kózdeletinine qatysty naqty jumystar baryn da aıtyp ótti.

«Biraq sizder usynys otyrǵan tyń usynystar memlekettik mekemelerge, tipti aýdan ákimdikterine deıin jańa monopolııalardy qurýǵa jol ashqaly otyr. Bul Memleket basshysynyń tapsyrmasyna qaıshy keledi ǵoı. Áriptesterimniń ýájimen kelisemin. Kereksiz normany zań jobasynan alyp tastaý kerek», - dedi ol Parlament Májilisiniń jalpy otyrysynda.

Májilis Tóraǵasynyń bul eskertpesimen Ulttyq ekonomıka mınıstri Rýslan Dálenov kelisetinin jetkizip, zań jobasyn ekinshi oqylymda túzeıtinin málim etti.

Eske sala ketsek Rýslan Dálenov búgin Májiliste Qazaqstandaǵy bıznes-ahýaldy jaqsartý máseleleri boıynsha jańa zań jobasyn tanystyrǵan bolatyn.