Nurlan Nyǵmatýlın AQSh-tyń Qazaqstandaǵy elshisin qabyldady
Taraptar ekijaqty qarym-qatynasty, sonyń ishinde, parlamentaralyq yntymaqtastyqty nyǵaıtýdyń ózekti máselelerin talqylady.
N. Nyǵmatýlınniń pikirinshe, Amerıka elimen jan-jaqty ári ózara tıimdi qatynasty nyǵaıtý bizdiń elimizdiń syrtqy saıasatynyń mańyzdy baǵyttarynyń biri. Aǵymdaǵy jyly qos memleket arasynda dıplomatııalyq qatynastyń ornaǵanyna 28 jyl tolady. Osy ýaqyttar ishinde, senimdi saıası dıalog ornap, ekijaqty baılanys keńeıtilgen strategııalyq áriptestik deńgeıine jetti.
Palata tóraǵasy atap ótkendeı, 2018 jyly Qazaqstannyń Tuńǵysh Prezıdenti Nursultan Nazarbaevtyń AQSh-qa resmı sapary bizdiń elderimiz arasyndaǵy yqpaldastyqtyń aıryqsha sıpatyn kórsetti.
Saýda-ekonomıkalyq salany sóz etkende, N. Nyǵmatýlın ekijaqty taýar aınalymy 2018 jyly 2,25 mlrd. dollarǵa jetkenin, ótken jylmen salystyrǵanda 37 paıyzǵa óskenin alǵa tartty.
Májilis tóraǵasynyń aıtýynsha, eki memlekettiń ınvestıtsııalyq yntymaqtastyǵynda qarjy sektory, kólik, kommýnıkatsııa, taý-ken óndirisi, farmatsevtıka salalary basym baǵyttarǵa ıe.
Májilis Spıkeri elderimiz arasyndaǵy parlamentaralyq ózara is-qımyldy tereńdetýdiń mańyzdylyǵyn aıtty.
Májiliste AQSh-pen yntymaqtastyq jónindegi top jumys isteıdi. Amerıkada qurylǵan «Qazaqstan dostary tobymen de» belsendi áriptestik bar. N. Nyǵmatýlın zańnamalyq tájirıbeni meńgerý jáne etene baılanys ornatý maqsatynda atalǵan toptar men beıindi komıtetter deńgeıinde saparlar almasý pratıkasyn engizýdiń qajettiligine toqtaldy.
Sondaı-aq, Májilis Spıkeri AQSh Kongresi qarjylandyratyn «Ashyq álem» baǵdarlamasynyń da depýtattar men apparat qyzmetkerleri úshin quqyqtyq jáne kásibı tájirıbe almasýdyń erekshe múmkindigi ekenin atap ótti.
Taraptar birlesken syndarly jumys - parlamentaralyq baılanystardy, sonymen birge, ekijaqty qatynastardy nyǵaıtýǵa keń jol ashatynyna senimdi.