Nurlan Nyǵmatýlın: Abaı murasy qazaq halqynyń san ǵasyrlyq danalyǵynyń kórinisi
«Barsha qazaqstandyqtardy bıyl tuńǵysh ret atalatyn Abaı kúnimen quttyqtaımyn! Abaı murasy – elimizdi, halqymyzdy árqashanda jańashyldyqqa, ádildikke, ǵylym-bilimge, órkenıetke jeteleıtin baǵa jetpes qundylyq. Elim, jerim deıtin árbir azamat úshin Uly aqynnyń ósıetin bilý qasıetti paryz», - dep jazdy N.Nyǵmatýlın Twitter-degi paraqshasynda.
Májilis Tóraǵasy dál búgin uly aqyn, danyshpan oıshyl, ultyn ulylyqqa úndegen dara tulǵa Abaıdyń týǵanyna 175 jyl tolǵanyn aıta kelip, Abaı kúni merekesiniń mańyzdylyǵyna toqtaldy.
«Osy oraıda, Nurlan Nyǵmatýlın El Basshylyǵy árqashanda Abaı murasy arqyly elimizdiń rýhanı baǵytyn damytýǵa zor kóńil bólip kele jatqanyn atap ótti. Oǵan Elbasy Nursultan Ábishuly Nazarbaevtyń Abaıdy qazaqtyń boıtumary retinde, al Memleket basshysy Qasym-Jomart Kemeluly Toqaevtyń Abaıdy rýhanı reformator retinde dáriptep, Qazaqstan qoǵamyn Abaı ustanymyna saı damytý qajettigi týraly bastamasy dálel deýge bolady», - delingen palata saıtynda.
Májilis Spıkeriniń pikirinshe, qazaq halqynyń san ǵasyrlyq danalyǵynyń kórinisi sanalatyn uly aqynnyń baı murasy elimizdiń rýhanı damýynyń negizi. Májilis Tóraǵasy atap ótkendeı, adamzattyń Abaıy atanǵan kemeńgerdiń asyl sózderi búkil álemge ortaq qundy qazyna. Al, týǵan halqy úshin Abaı ósıeti adamgershilik asyl qasıetterdi bıik ustaı otyryp, alǵa jeteleýshi rýhanı zor kúsh. Sonymen birge, barsha qazaqstandyqtardy ortaq maqsatqa biriktire otyryp, órkenıet bıigine jeteleıtin jaryq juldyz ekeni sózsiz.