Nurlan Noǵaev TMD elderiniń Elektr energetıkasy keńesi otyrysyna qatysty

NUR-SULTAN. QazAqparat - QR Energetıka mınıstri Nurlan Noǵaev beınebaılanys arqyly ótken TMD elderi Elektr energetıkasy keńesiniń otyrysyna qatysty, dep habarlaıdy QazAqparat QR Energetıka mınıstrliginiń baspasóz qyzmetine silteme jasap.

Nurlan Noǵaev óz baıandamasy sheńberinde keńes qatysýshylaryn Qazaqstannyń elektr energetıkasy salasyndaǵy sońǵy ózgeristerimen tanystyrdy. Atap aıtqanda, 2020 jyldyń jeltoqsanynda Qazaqstan qabyldaǵan «Elektr energetıkasy týraly» Zańǵa engizilgen ózgerister jóninde aıtyp berdi. Túzetýler sheńberinde generatsııanyń manevrlik rejımi bar generatsııalaıtyn qondyrǵylardyń qurylysyna aýktsıondyq tetik engizildi.

«Bıylǵy jyldyń jeltoqsanynda qýaty shamamen 1000 MVt bolatyn áleýeti joǵary jobalar boıynsha aýktsıondyq saýda-sattyq uıymdastyrý josparlanyp otyr», dep atap ótti QR Energetıka mınıstri Nurlan Noǵaev otyrys barysynda.

Sondaı-aq Energetıka mınıstri 2021 jyldyń sońyna deıin JEK qýatyn aǵymdaǵy 1800MVt-tan 2100 MVt-qa deıin arttyrý boıynsha Qazaqstannyń josparlary týraly habarlady.

QR Energetıka mınıstri N. Noǵaevtyń aıtýynsha, 2020 jyly Qazaqstanda elektr energetıkasyn óndirý 108 mlrd Kvt/saǵ. qurady, al 2021 jyldyń qorytyndysy boıynsha 109 mlrd kVt/saǵ. óndirý kútilýde.

Otyrys sheńberinde Úılestirý keńesi týraly Ereje, TMD elderiniń Elektr energetıkasy keńesiniń reglamenti bekitildi, TMD elderi Elektr energetıkasy keńesiniń 2020 jylǵa esebi tyńdaldy, Elektr energetıkasy keńesiniń 2021 jylǵa arnalǵan is-sharalar jospary ózektendirildi.