Nurlan Noǵaev ShYU elderi Energetıka mınıstrleriniń birinshi kezdesýine qatysty

NUR-SULTAN. QazAqparat - Onlaın formatta ótken kezdesýge uıymnyń tóraǵasy bolyp tabylatyn tájik tarapy bastamashylyq etti. Іs-sharaǵa Úndistan, Qytaı, Qyrǵyzstan, Reseı, Pákistan jáne Ózbekstannyń energetıkalyq vedomstvolarynyń basshylary qatysty, dep habarlaıdy QazAqparat QR EM baspasóz qyzmetine silteme jasap.

Nurlan Noǵaev óz sózinde qazirgi álemdik ekonomıkalyq jaǵdaıdy eskere otyryp, ShYU-ǵa qatysýshy elder arasyndaǵy kooperatsııanyń mańyzdylyǵyn atap ótti. Qazaqstannyń energetıka mınıstri Shanhaı Yntymaqtastyq Uıymy elderiniń energetıka salasyndaǵy birlesken jumysy strategııalyq sıpatqa ıe jáne uzaq merzimdi bolyp tabylatyndyǵyn aıtty.

Sondaı-aq vedomstvo basshysy respýblıkanyń jer qoınaýyn paıdalaný, munaı, gaz jáne JEK salasyndaǵy basty jetistikteri týraly málim etti.

Máselen, 2020 jylǵy 1 qyrkúıekten bastap Qazaqstanda táýelsizdik jyldary alǵash ret kómirsýtekti shıkizat boıynsha jer qoınaýyn paıdalaný quqyǵyn alý úshin elektrondyq aýktsıondar ótkizý uıymdastyryldy. Bul jaǵdaıda sheteldik jáne otandyq ınvestorlardyń qatysýǵa quqyǵy bar.

Sonymen qatar, otyrysqa qatysýshylar munaı-gaz salasyn basqarýdyń tıimdiligin arttyrý jónindegi josparlar týraly habardar etildi.

- Respýblıka Úkimeti shıki munaı men gaz kondensatyn esepke alýdyń aqparattyq júıesin engizýdi júrgizýde. Aǵymdaǵy jyly Qazaqstannyń jalpy munaı óndirý kóleminiń 60%-yn qamtamasyz etetin uıymdardy qosý josparlanýda, - dep tolyqtyrdy Nurlan Noǵaev.

Budan basqa, ekonomıkany tómen kómirtekti damytýǵa kóshirý jónindegi maqsattarǵa qol jetkizý úshin ótken jyldyń qorytyndysy boıynsha Qazaqstan eldiń jalpy energııa balansyndaǵy JEK úlesin 3%-ǵa deıin jetkize aldy, al sońǵy 5 jylda JEK obektileriniń belgilengen qýaty 7 esege jýyq – 2015 jylǵy 240 MVt-tan 2020 jyly 1 634,7-ge deıin ósti.

Qoryta kelgende, Nurlan Noǵaev uıym músheleri arasyndaǵy energetıka salasyndaǵy yntymaqtastyqty odan ári tereńdetý maqsatynda 2012 jyly qurylǵan ShYU energetıkalyq klýbynyń jumysyn jalǵastyrýdy usyndy. ShYU energetıkalyq klýbynyń sońǵy otyrysy 2016 jyly ótti.

- Shanhaı Yntymaqtastyq Uıymy alańyndaǵy birlesken jumys elderimizdiń ekonomıkalyq damýyna, sondaı-aq energetıka salasyndaǵy birlesken jobalardy qurýǵa sózsiz yqpal etetin bolady. Álemdik ekonomıkanyń damý qarqynyn qalpyna keltirý úshin kúsh biriktirýdiń ýaqyty keldi, - dep túıindedi mınıstr.