Nurlan Noǵaev pen Darhan Káletaev atyraýlyq jastarmen kezdesti
Atyraý oblystyq jastar saıasaty máseleleri jónindegi basqarma basshysy Rollan Quspan jastar bastamalaryn qoldaýdyń óńirlik Jol kartasy jaıynda baıandady. Usynylǵan ıdeıalardyń kóbine mınıstr qoldaý bildirdi.
«Memleket basshysy 2019 jyldy Jastar jyly dep jarııalady. Bul úlken jumystardyń basy ǵana jáne bir jylmen shektelmeıdi. Biz jastar qozǵalysyn damytýdyń negizgi baǵyttaryn anyqtap alýymyz kerek», - dedi Darhan Káletaev.
Mınıstr jastardyń aldynda turǵan basty mindet bilim alý, jumysqa ornalasyp, otbasyn qurý ekenin atap ótti. «Memlekettik jastar saıasaty» degen uǵymǵa baılanyp qalýǵa bolmaıdy.
«Mundaı uǵymnan alystaýymyz kerek dep oılaımyn. Al jastarmen jumys, áleýmettik beıimdeý - jastardyń máselelerin sheshýdiń tıimdi baǵyty. Bul jumystar áleýmettik ádis-tásilder aıasynda qarastyrylýy tıis», - dep atap ótti mınıstr.
Qaletaevtyń pikirinshe, barlyq memlekettik baǵdarlamalardy júzege asyrýǵa jastardy tartý tetikterin iske qosý kerek. Aımaqtarda jumystyń basty baǵyttary kórsetilgen Jol kartasy daıyndalýda. Bul - jastar ınfraqurylymyn damytý, bilim berý, jumyspen qamtý, densaýlyq, qoljetimdi baspana, kásipkerlikti qoldaý, qarjylyq saýattylyqty arttyrý, quqyq mádenıeti, sybaılas jemqorlyqqa tózbeýshilik deńgeıin kóterý, otansúıgishtik sezimdi nyǵaıtý, talantty jastardy qoldaý, jastardyń úkimettik emes uıymdaryn damytý, jasalǵan jumystarǵa aqparattyq qoldaý kórsetý sekildi sharalardy qamtıdy.
«Memleket basshysy jastarmen jumysta basym eki baǵytqa nazar aýdardy. Olar - jas maman jáne jas kásipker. Aldaǵy úsh jylda osy eki baǵytty damytýǵa 120 mlrd teńge qaralady. Baǵdarlamalar daıyndalyp jatyr, sondyqtan atalǵan jobalardy iske asyrý úshin usynystaryńyz ben ıdeıalaryńyzdy berýlerińizge bolady», - dedi D.Káletaev.
Aımaqtaǵy jastar qozǵalystarynyń jetekshilerimen kezdesýde eriktiler týraly, «aqyl-oıdyń shetke aǵylýy», jas ǵalymdardy qoldaý, otbasyn damytý, «Jasyl el» baǵdarlamasyna qatysý týraly áńgime qozǵaldy.
«Aqyl-oıdyń shetke aǵylýy» - búkilálemdik tendentsııa. Bul másele kóp elderde ózekti bolyp otyr. Mysaly, kórshiles Reseıde de atalǵan másele alańdaýshylyq týǵyzýda. Jastar jyly aıasynda Prezıdent jas ǵalymdar úshin grant berýge 3 mlrd teńge bólý týraly bastama kóterdi. Bul bastapqy qadam, alǵa qaraı da sharalar usyný kerek», -dep atap ótti mınıstr.
Mamyr aıynda Qostanaıda eriktiler qozǵalysy boıynsha Qazaqstan-Reseı forýmy ótedi, oǵan Memleket basshysy qatyspaq. Reseıde bul baǵyt memlekettik deńgeıde jaqsy damyǵan, tájirıbe almasýymyz kerek.
Mınıstrlik quzyrly memlekettik organdarmen otbasyn qoldaý men damytýdyń Jol kartasyn daıyndady. Basty kórsetkish - ajyrasý oqıǵalarynyń sanyn azaıtý, ásirese jas otbasylardyń arasynda ajyrasý beleń alyp barady. Osy maqsatta otbasylyq sottar janynan resýrstyq qoldaý kórsetý ortalyǵyn ashý, jastar resýrstyq ortalyqtarynyń janynan nekege turar aldynda jas otbasylarmen jumys bólimderin ashý josparlanyp otyr. Jas qazaqstandyqtardy qoldaý úshin úsh iri qalada jalǵa beriletin turǵyn úı qurylysyn júrgizý, jumyssyzdyqty azaıtý, stýdent-eriktilerdiń stıpendııalaryn kóterý sharalary da josparda bar.
Atyraý oblysynyń ákimi Nurlan Noǵaev kezdesýdi aıaqtaı kele búgingi jastardyń basty problemalaryna toqtaldy.
«Jastar óz maqsattaryna jetý úshin kóp jumys atqarýlary kerek. Ár jasta úzdiktiń úzdigi bolýǵa degen talpynys bolýy tıis. Sonda ǵana jaqsy nátıjege qol jetkizýge bolady. Bizde talantty jastar kóp, biraq tabys degen talanttyń bir paıyzy ǵana, qalǵan 99 paıyzy - taza eńbek», -dedi Nurlan Noǵaev.
Jastarmen áńgimelesken oblys ákimi stýdenttik jyldaryndaǵy qıyndyqtaryn eske aldy.
«Qıyn kez boldy, sabaq ýaqytynda jumys isteýge týra keldi. Búgingi jastarda múmkindik kóp, bizdiń kezimizde ondaı ıgilikter bolǵan joq. Men ata-anamdy qınaǵym kelmedi, úıden aqsha suraǵym kelmedi. Jumys isteý kerek dep sheshtim. Biraq odan eshkim jaman bolmady, múmkin ómirdiń túrli kezeńderinde shyńdalǵannan keıin biz myqty boldyq. Mysaly, baspana máselesi de kókeıtesti. Otbasyn qurǵannan keıin segiz jyl basymda úı bolǵan joq. Ártúrli jerlerde páter jaldap kún kórdik. Sanap otyrsaq, sol segiz jylda óz úıimizdi alýǵa bolatyndaı qarjy jumsappyz. Ókinishti árıne, biraq ne isteı alamyz? Sonyń bárinen óttik. Qazir jastarǵa múmkindik kóp. Búginde úıge muqtaj adamdar kómek surap kelse, olardy jaqsy túsinemin. Bul bárinde birdeı osyndaı qıyndyq bolýy kerek degendi ańǵartpaıdy. Biraq ony ýaqytsha qıyndyq dep túsiný kerek, ómirdiń ótkelderinde shyńdalǵannan keıin bári qalpyna keledi»,-dedi Nurlan Noǵaev.
Aımaq basshysynyń pikirinshe, qazir basqa ómir, basqa múmkindikter, alaıda básekeles orta áli de bar. Sondyqtan, memleket bergen múmkindikterdi tıimdi paıdalana bilý kerek.