Nurlan Noǵaev: OPEK + kelisimi boıynsha mindettemelerdi oryndaý 99%-dy qurady
«Ózenmunaıgaz» ken ornyn aralaý barysynda Nurlan Noǵaev mýltıfazaly
sorǵy qondyrǵysynyń, jerasty jabdyqtaryn jóndeý jáne dıagnostıkalaý tsehynyń, sýdy aldyn ala aǵyzý qondyrǵysynyń, munaı kásipshiligi jabdyqtary men tehnologııalyq kommýnıkatsııalardy jóndeý basqarmasynyń jumysymen tanysty.
«Jetibaımunaıgaz» ken ornynda Mınıstr óndiristik basqarmany, sondaı-aq ken orny mýzeıin aralady.
Sonymen qatar, Nurlan Noǵaev tabıǵı, ilespe munaı gazy men gaz kondensatyn óńdeýdi júzege asyratyn qazaqstandyq gaz óńdeý zaýytynda boldy. Zaýyt taýarlyq (qurǵaq) gazdy, suıytylǵan munaı gazyn (SMG), peshtik turmystyq otyndy, sondaı-aq kómirsýtegi eritkishin óndiredi.
Munaı kásiporyndarynyń jumyskerlerimen kezdesý barysynda Energetıka mınıstri pandemııanyń Qazaqstannyń munaı ındýstrııasyna áseri týraly aıtty. 2020 jyly munaı óndirý jospary 90-nan 85 mıllıon tonnaǵa deıin qysqardy, bul óz kezeginde munaı óndirýshi jáne munaı servıstik kompanııalarynyń jumys kóleminiń tómendeýine alyp keldi. Qazaqstan Úkimeti óz kezeginde osy kompanııalardy qoldaýǵa baǵyttalǵan birqatar ákimshilik jáne salyqtyq sharalardy qabyldady.
Áńgimelesý barysynda Mınıstr munaı ındýstrııasynda jumys isteıtin kompanııalarǵa pandemııa kezeńinde kórsetken kómekteri úshin, atap aıtqanda jedel járdem mashınalaryn syıǵa bergeni, dári-dármektermen qamtamasyz etkeni jáne patsıentter úshin tósek-oryn uıymdastyrǵany úshin alǵysyn bildirdi.
Sonymen qatar, Nurlan Noǵaev OPEK+kelisimi sheńberinde Qazaqstannyń júrgizip jatqan jumysy týraly aıtyp berdi.
- Qazaqstan OPEK+-pen tyǵyz yntymaqtastyq ornatqan. Pandemııa adamzattyń barlyq salalaryna úlken túzetýler jasady, munaı salasy da osydan tys qalǵan joq. Munaı eksporttaýshy elderdiń kelisimi arqasynda biz munaı men munaı ónimderi naryǵynda tepe-teńdikti saqtap, keıbir ken oryndarynyń avarııalyq toqtap qalýynyń aldyn aldyq. 2020 jyl barlyq munaı salasy úshin synaq boldy, alaıda birlesken kúsh-jigerdiń arqasynda naryqtaǵy suranys pen usynystyń tepe-teńdigi birtindep qalpyna kelýde.
Men Qazaqstannyń munaı salasynyń barlyq qyzmetkerlerine olardyń eńbegi úshin alǵys aıtqym keledi. Ortaq kúsh-jigerdiń arqasynda biz elimizdiń otyn-energetıkalyq kesheni úshin jaǵymsyz saldarlardan qutyla aldyq, - dep atap ótti Nurlan Noǵaev.
2020 jylǵy qazanda aıynda, aldyn ala resmı derekterge sáıkes Qazaqstanda kondensatty esepke almaǵanda munaı óndirý táýligine 1,400 mln.barreldi qurady. OPEK + kelisimi boıynsha mindettemelerdi oryndaý deńgeıi 99%-dy qurady.