Nurlan Noǵaev: Mańǵystaýlyqtardyń bárin munaı-gaz salasyna jumysqa ornalastyrý múmkin emes
Esep berý kezdesýinde Jańaózen qalasynyń ákimi Maqsat Ibagarov 2021 jyly atqarylǵan jumystardyń qorytyndysyn baıandap, 2022 jylǵa arnalǵan josparlar týraly aıtyp berdi. Oblys ákimi Nurlan Noǵaev óz kezeginde jınalǵandardy óńirde júrgizilip jatqan jumystar týraly habardar etip, olardyń suraqtaryna jaýap berdi, usynystaryn tyńdady.
Kezdesýde qala turǵyndary jumyspen qamtý, aýyz sý tapshylyǵy, medıtsına salasyndaǵy kadr tapshylyǵy, eski kóppáterli turǵyn úılerge kúrdeli jóndeý júrgizý, kásipkerlikti damytý jáne qoǵamdyq kólikterdiń sanyn arttyrý boıynsha máselelerdi kóterdi.
Nurlan Noǵaev óńirde azamattardy túrli salalarda jumysqa ornalastyrýǵa baǵyttalǵan birqatar memlekettik baǵdarlama bar ekenin atap ótti. Alaıda kópshilik munaı-gaz salasyna ǵana jumysqa ornalastyrýdy surady.
«Prezıdent Qasym-Jomart Toqaev Joldaýynda memlekettik organdar jumysynyń basty qaǵıdaty ádilettilik pen ashyqtyq bolyp tabylatynyn atap ótti. Halyqtyń týyndaǵan barlyq máselelesin biz quqyqtyq salada, qoldanystaǵy zańnama aıasynda sheshetin bolamyz. Bul eńbek daýlaryna da, jumysqa ornalasý máselelerine de qatysty. Meniń jeke qabyldaýyma kelgen turǵyndar ózderin nemese otbasy múshelerin munaı-gaz salasyna jumysqa ornalastyrý boıynsha ótinish bildiredi. Men qoldanystaǵy algorıtmdi attap ótip, kezekten tys jumysqa turǵyza almaımyn, jumyspen qamtý ortalyǵyn aınalyp óte almaımyn. Sebebi, bul jumysqa ornalasý kezeginde turǵan azamattarǵa ádiletsiz bolady. Bizdiń basty mindetimiz - ózekti máselelerdiń júıeli sheshimin tabý. Barlyq oblys turǵynyn munaı-gaz salasyna jumysqa ornalastyrý múmkin emes ekendigin túsiný mańyzdy. Sondyqtan biz túrli beıindegi shaǵyn jáne orta bıznes kásiporyndarynda jumys oryndaryn qurý boıynsha jumystardy jalǵastyratyn bolamyz. Biz birlesip qana jańa Qazaqstandy qura alatynymyzdy atap ótkim keledi», - dedi Nurlan Noǵaev.
Eseptik kezdesý aıaqtalǵannan keıin oblys ákimi azamattardy jeke qabyldady.
2022 jyldyń esebi boıynsha Jańaózende 159 myń adam tirkelgen. Onyń 77 myńy Teńge, Qyzylsaı, Rahat, Kendirli aýyldarynda turady. Densaýlyq saqtaý salasynda 10 medıtsınalyq uıym jumys isteıdi, onyń ishinde: 3 emhana, 1 kóp beıindi aýrýhana, 2 dárigerlik ambýlatorııa, jedel jáne shuǵyl járdem stantsııasy bólimshesi jáne 3 jeke menshik uıym.
Búginde qalada 86 dáriger mamany jetispeýshiligi baıqalady. Bul máseleni sheshý úshin respýblıka kólemindegi medıtsınalyq joǵarǵy oqý oryndarymen kelissóz júrgizilip, túlekter jármeńkelerine qatysyp, mektep bitirýshilerdiń arasynda bilikti, tájirıbeli dárigerlermen proforıentatsııalyq jumystar uıymdastyrylýda.
Jańaózen qalasyna aýyz sý táýligine ortasha 30 myń tekshe metr kóleminde berilýde. Jaz aılarynda aýyz sý qajettiligi 42-45 myń tekshe metrge deıin jetedi. Demek, aýyz sý tapshylyǵy ortasha táýligine 10-12 myń tekshe metrdi quraıdy. Osy aýyz sý tapshylyǵyn sheshý maqsatynda «Kendirli demalys aımaǵynyń aýdanynda magıstraldyq qubyry bar, qýaty táýligine 50 myń tekshe metr teńiz sýyn tushytý zaýytyn salý» jobasy iske asyrylýda.
Sonymen qatar «Nurly jer» baǵdarlamasy sheńberinde «Teńge jáne Rahat aýyldaryndaǵy aıaqtalmaǵan jer ýchaskeleriniń ınjenerlik jelileriniń (9,5 shaqyrym gaz qubyry, 9,3 shaqyrym sý qubyry, 9 shaqyrym elektr jelisi) qurylysyn salý» jobalary iske asyrylýda.