Nurlan Noǵaev Mańǵystaý oblysynyń turǵyndaryna alǵys aıtty
«Qurmetti mańǵystaýlyqtar, qadirli jerlester! Ózderińizben birge óńirimizdiń damýy men ıgiligi úshin jumys isteý men úshin úlken mártebe boldy. Úsh jylǵa jýyq ýaqyt buryn Memleket basshysy Qasym-Jomart Kemeluly Toqaev maǵan Mańǵystaý oblysyn basqarýdy tapsyrdy, osy úlken senimi úshin Prezıdentimizge rahmet aıtamyn. Mańǵystaýdaǵy qyzmetim barysynda árdaıym Prezıdentimizdiń qoldaýyna ıe bolyp, bilimimdi, kásibı, ómirlik tájirıbelerimdi, biliktiligimdi óńirdiń damýyna jumsadym», — dedi ol Telegram kanalyna jazǵan úndeýinde.
Onyń sózinshe, óndiris oryndaryn, sharýashylyqtardy, turǵyndardy sapaly sýmen qamtamasyz etý, MAEK-tiń úzdiksiz jumysyn qamtamasyz etý, ınjenerlik jelilerdi jańartý, negizsiz bólingen jer telimderin qaıtarý jáne zańsyz qurylystarmen kúresý baǵytynda, t. t. aýqymdy jumystar atqarylǵan.
«Osy úsh jyl ishindegi oblys ıgiligi úshin birlesken nátıjeli eńbekterińiz úshin shyn júrekten alǵys aıtamyn. Áriptesterime, ár deńgeıdegi depýtattyq korpýsqa, barlyq kásiporyndar ujymyna, jastarǵa, qoǵamdyq jáne etnomádenı birlestikterge, qurmetti ardagerlerge — barsha mańǵystaýlyqtarǵa shynaıy alǵysymdy bildiremin! Ashyq aspan astyndaǵy murajaı atanǵan osynaý kıeli ólkede ótken kezeń meniń júregimde jyly estelik bolyp máńgi saqtalady. Mańǵystaý — ekonomıkasy nyq, damý áleýeti zor óńir. Eń bastysy óz elin súıetin, onyń gúldenýi úshin baryn salatyn rýhy bıik halqy bar. Sizderge barlyq jaqsylyqty tileı otyryp, tabys pen jańa jetistikterge jete berýlerińizge shyn júrekten tilektespin», — dedi Nurlan Noǵaev.
Buǵan deıin habarlaǵanymyzdaı, 16 mamyr kúni Memleket basshysynyń Jarlyǵymen Nurlan Asqaruly Noǵaev Mańǵystaý oblysynyń ákimi laýazymynan bosatyldy.
Mańǵystaý oblysynyń eks-ákimi Nurlan Noǵaev nesimen este qalǵanyn osy aqparattan oqı alasyz.
Prezıdent Jarlyǵymen Nurdáýlet Qılybaı Mańǵystaý oblysynyń ákimi laýazymyna taǵaıyndaldy.