Nurlan Noǵaev qyzmetshilerin múmkindiginshe ashyq jumys isteýge shaqyrdy
Memlekettik qyzmet isteri jáne sybaılas jemqorlyqqa qarsy is-qımyl agenttiginiń Atyraý oblystyq departamentiniń basshysy Toqtamys Jumaǵulov sybaılas jemqorlyqpen kúres baǵytynda atqarylǵan jumystar týraly aıtty.
«Ótken jyly oblysta 132 sybaılas jemqorlyq deregi tirkeldi. Olar negizinen turǵyn úı-kommýnaldyq, jer qatynastary salalarynda jasalǵan. Bul faktorlarǵa yqpal etetin birneshe sebepter bar, solardyń bastalary memlekettik qyzmetshilerdiń bilim-biliktilikteri men daıyndyq deńgeıimen baılanysty», - dep atap ótti T.Jumaǵulov.
Atyraý oblysynyń ákimi Nurlan Noǵaev qaramaǵyndaǵylardy óz mindetterin oryndaýǵa jaýapkershilikpen qaraýǵa shaqyrdy.
«Memlekettik qyzmetshilerge qoıylatyn talap joǵary. Ár memlekettik qyzmetshi ózine júktelgen mindetine jaýapkershilikpen qaraýy kerek. Qazaqstan Prezıdenti jaqynda oblys ákimderimen kezdesýinde osyǵan jete mán berdi. Prezıdent áleýmettik jelilerde belsendilik tanytyp, júrgizilip jatqan memlekettik saıasatty túsindirýdi, halyqpen keri baılanys ornatýdy baqylaýda ustaýdy tapsyrdy», - dedi Nurlan Noǵaev.
Qazaqstan Prezıdenti ákimderge turǵyndarmen baılanystyń jańa kezeńine ótýde jedel áreket etýdi tapsyrdy. Aımaq basshylarynyń azamattarmen jeke baılanys ornatýy mańyzdy.
«Bıliktiń bul áreketteriniń bári sybaılas jemqorlyqty azaıtýǵa baǵyttalady. Kóp máseleni onlaın rejımde sheshýge bolady. Barlyq basqarma basshylaryna, aýdan ákimderine ashyq bolýdy, jınalysta aıtylǵan máselelerge nazar aýdarýdy tapsyramyn», - dedi aımaq basshysy.
Búginde halyqtyń 80% memlekettik qyzmetterdi elektrondy túrde alady. Bul atqarýshylarmen tikeleı baılanys táýekelderin tómendetedi. Jer telimin alý kezegine turý, balabaqsha kezegi sekildi qyzmetter Atyraý oblysynyń geoportaly arqyly júzege asady. Aımaq basshysy basqa baǵyttar boıynsha da jumystardy jedeldetýdi tapsyrdy. Oblystyń ár turǵyny óz máseleleri boıynsha jedel, naqty jaýap alýlary tıis.
«Qazir áleýmettik jeliler arqyly máseleler sheshilip jatyr. Telegram jelisindegi «Atyraý oblystyq ákimdigi» qosymshasyna turǵyndardan saýaldar kóp túsedi. Turǵyn úı-kommýnaldyq sharýashylyǵy, jer telimderin, baspana bólý salarynda. Turǵyndardyń saýaldaryna jedel jaýap berý arqyly kóp máselelerdi sheshemiz. Barlyq basshylarǵa óz qyzmetterine ishki taldaý júrgizý kerektigin eskertemin. Telegram-da ár aýdannyń chat-kanaly ashyldy. Qazir azamattarmen qalaı jumys istep jatqandaryńyzǵa qarap otyrmyz, keıbir aýdandarda tek qolaıly saýaldarǵa jaýap berý jaǵdaılary kezdesýde. Bulaı bolmaıdy. Eskertýdi qaperge almaǵan basshylarǵa shara qoldanylady», - deıdi Nurlan Noǵaev.
Atyraý oblysy ákimdiginiń baspasóz qyzmetiniń habarlaýynsha, barlyq aýdan ákimderiniń chat-kanaldary boıynsha taldaý júrgiziledi, sonyń negizinde ár aýdannyń ashyqtyq reıtıngi jasalady.