Nurlan Noǵaev: Kóptegen óńirdiń energııa boıynsha qaryzy bar

NUR-SULTAN. QazAqparat – Energııa óndirýshi uıymdardyń «QazTransGaz-Aımaq» aktsıonerlik qoǵamy aldyndaǵy bereshegi bir jyl ishinde aıtarlyqtaı azaıǵan, dep habarlaıdy QazAqparat tilshisi.

Bul týraly Energetıka mınıstri Nurlan Noǵaev Úkimet otyrysynda aıtty. Mınıstrdiń sózinshe, búgingi tańda energııa óndirýshi uıymdardyń «QazTransGaz-Aımaq» AQ aldyndaǵy bereshegi 667 mln teńge bolǵan. Al 2020 jyldyń mamyrynda bereshek mólsheri 7 mlrd 481 mln teńge bolǵan eken.

Sondaı-aq, energııa óndirýshi uıymdardyń «Bogatyr-Kómir» jaýapkershiligi shekteýli seriktestigi aldynda jalpy somasy 1 mlrd teńge bereshegi bar kórinedi.

«Kommýnaldyq kásiporyndardyń, kóterme saýda tutynýshylarynyń, energııamen jabdyqtaýshy jáne energııa berýshi uıymdardyń Mańǵystaý, Batys Qazaqstan, Aqtóbe, Almaty, Shyǵys Qazaqstan, Jambyl, Qaraǵandy, Qyzylorda, Pavlodar oblystaryndaǵy jáne Nur-Sultan, Almaty jáne Shymkent qalalaryndaǵy energııa óndirýshi jáne energııa berýshi uıymdardyń aldynda bereshegi bar.

Bul energııa óndirýshi jáne energııa berýshi uıymdardyń jóndeý jumystaryn ýaqtyly oryndaýyna teris áser etedi. Osyǵan baılanysty jergilikti atqarýshy organdar kommýnaldyq qyzmetter úshin bereshekti óteý jónindegi jumysty kúsheıtip, jandandyrý qajet», - dedi Nurlan Noǵaev.