Nurlan Noǵaev: Qazaqstan energııa resýrstarynyń jańa naryqtaryna qol jetkizýge múddeli

NUR-SULTAN. QazAqparat - QR Energetıka mınıstri Nurlan Noǵaev beınekonferentsııa formatyndaǵy Halyqaralyq Energetıkalyq Hartııanyń (HEH) mınıstrlik konferentsııasynyń 31-otyrysynda baıandama jasady, dep habarlaıdy QazAqparat atalmysh vedomostvonyń baspasóz qyzmetine silteme jasap.

Energetıkalyq Hartııa Konferentsııasynyń mınıstrlik sessııasy dástúrli túrde Hartııaǵa múshe elder úkimetteriniń, halyqaralyq uıymdardyń joǵary laýazymdy ókilderiniń jáne energetıkalyq kompanııalar basshylarynyń ınnovatsııalar róli men turaqty energetıkalyq tehnologııalardy damytý týraly saıası dıalogqa qatysýy úshin platforma retinde qyzmet etedi.

HEH energııa resýrstarynyń tranzıtin eksporttaıtyn, tutynatyn jáne júzege asyratyn elderdiń úkimetaralyq dıalogyn ilgeriletý jónindegi halyqaralyq energetıkalyq uıym bolyp tabylady.

QR Energetıka mınıstri Nurlan Noǵaev óz sózinde jahandyq energetıkalyq kún tártibiniń eń ózekti máselelerin, sondaı-aq tranzıt, ınvestıtsııalardy qorǵaý jáne energııa tıimdiligi sııaqty el úshin mańyzdy baǵyttardy qosa alǵanda, Energetıkalyq Hartııaǵa Shartty jańǵyrtý protsesiniń mańyzdylyǵyn atap ótti.

- Qazaqstan daýlardy sheshý aspektilerine, sondaı-aq ınvestıtsııalyq erejelerge qatysty Sharttyń erejelerin jańartýǵa múddeli. Biz tranzıt máselelerin talqylaý kezinde mynadaı negiz qalaýshy qaǵıdattardyń eskerilýine tereń qyzyǵýshylyq bildiremiz:

Jańa naryqtarǵa, sondaı-aq tranzıttik elderdiń ınfraqurylymyna kedergisiz qol jetkizý;

Energııa resýrstarynyń tranzıtin júzege asyrý úshin biryńǵaı quqyqtyq óris qurý; Táýekelderdiń týyndaýyn jáne daýlardyń saldaryn tómendetý; Energııa resýrstary naryǵyndaǵy suranys pen usynys teńgerimin saqtaý; Ekonomıkalyq múddeler teńgerimin saqtaý, - dedi Nurlan Noǵaev.