Nurlan Noǵaev Qaraǵandy men Aqmola oblystaryn gazdandyrýdyń keshigý sebebin atady
«Adamdar gazdy Nur-Sultan qalasy men Aqmola, Qaraǵandy oblystary ákimdikteriniń kestesi boıynsha alyp jatyr. Jekelep aıtsaq, Nur-Sultan qalasy ákimdiginiń aqparaty boıynsha astanany gazdandyrý jumystary úsh kezeńge josparlanǵan. Áýeli №1 jáne №2 jylý-elektr ortalyqtaryn gazǵa aýystyrý, Kóktal-1, Kóktal-2, Temirjolshylar shaǵyn aýdandaryn gazdandyrý kózdelgen. Qazir atalǵan jumystar júrgizilip jatyr. Bul – kóp jumysty qajet etetin sharýa», -dedi vedomstvo basshysy.
Mınıstrdiń sózine qaraǵanda, astanaǵa irgeles eldi mekenderdiń gazdandyrý jumystary kestege saı júrip jatyr. Al kórshi óńirlerdi gazdandyrý jumysynyń keshigýine uıymdastyrý jumystary túrtki bolsa kerek.
«Qaraǵandy oblysy boıynsha aıtsaq, búgingi tańda Temirtaý jáne Jezqazǵan qalalaryn gazdandyrý jumystary júrip jatyr. Árıne, Qaraǵandynyń ózine de gaz tartylady. Aqmola oblysyndaǵy jumystardyń keshigýine jobalaý-smetalyq qujattardyń ázirligi men merdiger tańdaý máselesi sebepker boldy. Qazir olar da qarqyn aldy. Astanany, Qaraǵandy jáne Aqmola oblystarynyń eldi mekenderin gazdandyrý Energetıka mınıstrligi maquldap bekitken kestege saı júrip jatyr. Energetıka mınıstrligi óziniń mindettemelir aıasynda barlyq jumystardy atqardy. «Saryarqa» gaz magıstrali tartyldy. Qazir ákimdikter jumysty ári qaraı jalǵastyrýda. Men bul óte aýqymdy joba dep esepteımin. Onyń tolyq iske asýyna ýaqyt kerek. Onyń ústine ómir óz túzetýlerin engizip jatyr», - dedi Nurlan Noǵaev.