Nurlan Noǵaev gaz óndirý josparynyń nege oryndalmaǵanyn aıtty

NUR-SULTAN. QazAqparat – Qazaqstan qańtar aıynda 736 mln tekshe metr gaz eksporttady. Bul týraly búgin Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«2021 jylǵy qańtar aıynyń qorytyndysy boıynsha 4,7 mlrd tekshe metr kóleminde gaz óndirildi. Jospar 97,7 paıyzǵa oryndaldy. Gaz óndirisiniń tómendeýine Teńiz ken ornynda elektr energııasynyń isten shyǵýy saldarynan munaı óndirýdiń tómendeýi áser etti. Óz kezeginde bul ilespe gaz óndirýdiń tómendeýine alyp keldi», - dedi Nurlan Noǵaev.

Mınıstrdiń aıtýynsha, taýarlyq gazdy ishki tutyný kólemi 2,5 mlrd tekshe metrge jetti. Kórsetkish qańtar aıynyń josparynan 112,4 paıyz artyq.

«Suıytylǵan munaı gazyn óndirý kólemi 280 myń tonna, jospardyń 102,6 paıyzyn quraıdy . Eksportqa shyǵarylǵan gaz kólemi 736 mln tekshe metrdi qurady. Esepti kezeńniń josparymen salystyrǵanda 119,3 paıyzǵa jetti», - dedi mınıstr.