Nurlan Noǵaev energetıka salasynda ońtústik óńirlerdegi jobalar týraly aıtty
«Elektr energııasyn tutynýdyń ósýin jáne eldiń energııa teńgerimindegi balamaly jáne jańartylatyn energııa túrleriniń úlesin eskere otyryp, manevrlik qýattardy damytý respýblıkanyń energetıkalyq qaýipsizdigin qamtamasyz etý úshin qajetti shart bolyp otyr. Osyǵan baılanysty, mınıstrlik generatsııalaýdyń manevrlik rejımi bar generatsııalaıtyn qondyrǵylardy salý tetigin iske asyrý aıasynda Túrkistan oblysy men Qyzylorda, Almaty qalalaryndaǵy alańdar boıynsha 2021 jylǵy jeltoqsanǵa arnalǵan aýktsıondyq saýda-sattyq ótkizý kestesin jarııalady. Sonymen qatar, Almaty qalasynyń ekologııasyn jaqsartý aıasynda «Samuryq-Qazyna» UÁQ» AQ qýat naryǵy sheńberinde 600 MVt deıingi bý-gaz qondyrǵysyn sala otyryp, Almaty qalasyndaǵy JEO-2-ni gazǵa aýystyrý, sondaı-aq qýaty 250 MVt deıingi bý-gaz qondyrǵysyn salý arqyly Almatydaǵy JEO-1-di jańǵyrtý jónindegi jobany iske asyratyn bolady», - dedi N. Noǵaev.
Onyń aıtýynsha, joǵaryda kórsetilgen jobalardy iske asyrý qorytyndylary boıynsha 2026 jylǵa qaraı eldiń ońtústiginde jalpy ınvestıtsııalar kólemi 1,2 trln teńgeden astam shamamen 2300 MVt qýatty iske qosý kútilýde.
«Bul rette, ońtústik óńirlerdiń qoldanystaǵy gaz ınfraqurylymy bolashaq jobalardy qajetti otyn kólemimen qamtamasyz etý úshin biraz sharalar qabyldaý qajet. Memleket basshysy atap ótken jobalardy tabysty iske asyrý úshin «Samuryq-Qazyna» UÁQ» AQ-ǵa «QazTransGaz» AQ-men birlesip, ońtústik óńirlerdiń ekonomıkasy men halqynyń gazǵa degen qajettiligin qamtamasyz etý, sondaı-aq energetıka jobalaryn iske asyrý úshin qosymsha ınfraqurylym salý máselesin pysyqtaımyz», - dedi mınıstr.
Eske salsaq, 1 qyrkúıek kúni QR Prezıdenti Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty halyqqa Joldaýyn jarııalady. Joldaýdyń tolyq mátini myna jerde.