Nurlan Noǵaev: Bıyl elimizde 125 myń tonna hosh ıisti kómirsýtekter óndiriledi
«Qazirgi ýaqytta respýblıkada jaǵarmaılardy, jol bıtýmdaryn, hosh ıisti kómirsýtekterdi, sondaı-aq polıpropılen men benzınge arnalǵan qospalardy shyǵaratyn kásiporyndar jumys isteıdi. Otandyq munaı-gaz-hımııa salasyndaǵy mańyzdy qadam bıyl Atyraý munaı óńdeý zaýytynda hosh ıisti kómirsýtekter - benzol, paraksılol óndirisiniń bastalýy. Osy jyly 125 myń tonna hosh ıisti kómirsýtegiler óndiriledi dep kútiledi», - dedi mınıstr búgin munaı-gaz-hımııa salasyn damytý máseleleri boıynsha kezdesýde.
Onyń dereginshe, jol bıtýmynyń óndirisi 2014 jylmen salystarǵanda 450 myńnan 900 myń tonnaǵa deıin, ıaǵnı eki esege artty. Bul avtojol salasynyń bıtýmǵa degen ishki qajettiligin tolyq qamtamasyz etýge múmkindik berip otyr.
«Sondaı-aq, osy jyldyń maýsym aıynda Almaty oblysynda qýaty jylyna 100 myń tonnany jáne quny 94 mln AQSh dollaryn quraıtyn jaǵarmaı óndiretin zaýyt iske qosyldy. Zaýyttyń iske qosylýy ishki naryqtyń qajettiligin qamtamasyz etip qana qoımaı, ony alys-jaqyn shetelderge eksporttaýǵa múmkindik beredi. Sonymen qatar, sońǵy jyldary álemdik munaı-hımııada gazdy shıkizat retinde paıdalanatyn keshender qurylysynyń ulǵaıý úrdisi baıqalady. Bul álemdik naryqtaǵy munaı baǵasynyń gazǵa qaraǵanda edáýir joǵary bolýymen baılanysty. Osyǵan oraıda, respýblıkada iske asyrylyp jatqan polıpropılen men polıetılen óndirisi boıynsha gaz-hımııalyq keshenderdiń ózektiligi odan saıyn artyp keledi. Dál osy polıetılen men polıpropılen barlyq polımerlerdi álemdik tutynýdyń 60 paıyzdan astamyn quraıdy», - dedi Nurlan Noǵaev.
Mınıstr dereginshe, Atyraý oblysynda memlekettik ındýstrııaldy-ınnovatsııalyq damý memlekettik baǵdarlamasy aıasynda qýaty 500 myń tonna polıpropılen jáne qýaty 1 250 myń tonna polıetılen óndiretin gazdy tereńdetip óńdeý boıynsha 2 iri joba iske asýda. Osy jobalar boıynsha ınvestıtsııalar kólemi shamamen 9 mlrd AQSh dollaryn quraıdy. Qurylys kezeńinde keminde 6000-nan astam jumys orny jáne paıdalaný kezeńinde 1000 jumys orny qurylatyn bolady.
«Birinshi joba polıpropılen óndirisi boıynsha ótken jyldan bastap qurylys jumystary júrgizilýde. Qurylys jumysy 52 paıyzǵa oryndaldy. Qurylys kestege sáıkes júzege asyrylýda, zaýytty iske qosý 2021 jylǵa josparlanǵan. Polıetılen jobasyn álemniń eń iri polımerler óndirýshileriniń qataryna kiretin avstrııalyq Borealis kompanııasymen birlesip iske asyrý josparlanyp otyr. Eki jobanyń JІÓ-ge jıyntyq úlesi 1,5 paıyz dep kútiledi», - dedi ol.