Nurlan Noǵaev: Balalarymyzdy ózge salalarda básekege qabiletti etýimiz qajet

AQTAÝ. QazAqparat - Mańǵystaý oblysynyń ákimi Nurlan Noǵaev Jańaózen qalasynyń bir top belsendi azamatymen kezdesip, turǵyndardy tolǵandyrǵan áleýmettik máselelerdi talqylady, dep habarlaıdy QazAqparat.

Oblys ákiminiń baspasóz qyzmetinen málim etkendeı, turǵyndar qaladaǵy aýyzsý, jumyssyzdyq, azyq-túlik baǵasy jáne ózge de áleýmettik máselelerdi sheshýdi surady.

Jıyn barysynda oblys ákimi Memleket basshysy Qasym-Jomart Toqaevtyń tapsyrmasymen Úkimet 2025 jylǵa deıingi Mańǵystaý oblysynyń áleýmettik-ekonomıkalyq damýynyń keshendi josparyn bekitkenin atap ótti.

«Bes jylǵa josparlanǵan joba aıasynda oblysqa 2,1 trln teńge tartylady. Keshendi jospar sheńberinde ınjenerlik jeliler, ınfraqurylym, aýyzsý óndiretin zaýyttar, zamanaýı mektepter men sport keshenderin salýǵa baǵyttalǵan barlyǵy 226 joba iske asady. Bul jumystar Jańaózen qalasynda da júzege asyrylatyn bolady,- dedi Nurlan Noǵaev.

Oblys ákiminiń aıtýynsha Jańaózen qalasyndaǵy bilim men densaýlyq salasynda da tyń jobalar iske asyrylady dep kútilýde.

«Nur-Sultan qalasynan bilim salasynda jumys istep júrgen kásipkerler toby kelip, Jańaózen qalasyndaǵy 10 mektepti senimgerlikke alamyz degen usynys jasady. Olar qarajatyn ózderi quıady, ishindegi oqý-ádistemelik quraldaryn jańadan jasaqtap, aǵymdaǵy jóndeý jumystaryn júrgizedi. Jumys toby sondaı-aq elimizdiń úzdik oqytýshylarynyń tájirıbelerin alyp kelip, mektep basshylary men muǵalimderiniń biliktiligin arttyrmaqshy. 10 jyl boıy akademıalyq jáne ádistemelik súıemeldeý júrgizip, memlekettik standart boıynsha bilim men tárbıe alatyndaı jaǵdaı jasaımyz dedi.

Bizdiń maqsatymyz balalarymyzǵa sapaly bilim men tárbıe berip, bolashaqtaryna senim uıalatyp, munaı salasynan basqa da jańa mamandyqtardy boılaryna sińirý. Munaı erteli-kesh túgesiledi. Biz balalarymyzdyń ózge salalarda básekege qabiletti bolýyn qamtamasyz etýimiz qajet.

Sondaı-aq, «Samuryq-Qyzyna», «QazMunaıGaz», «ÓzenMunaıGaz» kompanııalarynyń qarajatyna munaıshylarǵa ǵana emes, barlyq turǵyndarǵa arnalǵan eń ozyq úlgidegi medıtsınalyq ońaltý ortalyǵy (50 oryndyq) salynyp jatyr. Onda álemniń sońǵy úlgidegi medıtsınalyq qondyrǵylary ornatylatyn bolady. Ortalyq osy jyldyń birinshi toqsanynda paıdalanýǵa beriledi,- dedi oblys ákimi.

Jıyn sońynda aımaq basshysy aıtylǵan ózekti máseleler nazarǵa alynyp, óńirdiń damý josparyna sáıkes tıisti sheshimder qabyldanatynyn aıtty.