Nurlan Noǵaev: Atyraý oblysyndaǵy turǵyn úı qurylysy óz qarqynynan taımaıdy
Bıyl Atyraý oblysy táýelsizdik jyldaryndaǵy turǵyn úı qurylysy boıynsha elimizdegi eń úlken kórsetkishti kórsetti. Qazirgi tańda oblys boıynsha 44 úıdiń qurylysy júrip jatyr. Jyl sońyna deıin 34 úıdiń qurylysy aıaqtalady. Atap aıtsaq, «Bereke» yqshamaýdanynda 2622 páterlik 28 turǵyn úı qurylysy júrip jatyr. 936 páterlik 13 turǵyn úı nesıe arqyly, 1686 páterlik 15 turǵyn úı jaldamaly negizde beriledi. 1374 páter bolatyn 20 úıdiń qurylysy 2018 jyldyń jeltoqsan aıynda aıaqtalady.
«Barlyq úılerdiń aýlasynda balalar oıyn alańy, dúkender, dárihanalar, kólik turaqtary men beınebaqylaý kameralary bolady»,- dedi qalalyq qurylys bóliminiń basshysy Tımýr Basarov.
Sonymen qatar, «Nursaıa» yqshamaýdanyndaǵy 576 páterlik 8 úıdiń qurylysyn da jyl sońyna deıin aıaqtaý josparlanǵan. Atalǵan aýdanda 240 páterlik taǵy 2 úıdiń qurylysy júrip jatyr. Keler jyly paıdalanýǵa beriledi. Qaladaǵy Amandosov kóshesinde de 160 páterlik 2 turǵyn úı salynýda. «7-20-25» baǵdarlamasy boıynsha beriletin qos turǵyn úıdiń bireýiniń qurylysy shilde aıynda aıaqtalsa, ekinshisin jyl sońynda támamdaý josparlanǵan. Qala mańyndaǵy Talǵaıran aýylynda 60 úıdiń qurylysy aıaqtalýǵa jaqyn. Olardyń 28-i -1 páterli, 12-si - 1 páterli, eki qabatty jáne 20-sy - 2 páterli turǵyn úıler.
Oblystyq qurylys basqarmasynyń basshysy Málik Amanovtyń aıtýynsha, qurylys jumystaryna 85 paıyz otandyq qurylys materıaldary paıdalanylyp jatyr. Oblys ákimi Nurlan Noǵaev qurylys úshin barynsha otandyq ónimderdi paıdalanyp, kórsetkishti arttyrýdy tapsyrdy.
Turǵyn úıler qurylysymen tanysqan oblys ákimi jaýapty mamandarǵa osy qarqynnan taımaı, jumysty josparly túrde aıaqtaýdy tapsyrdy.
«Elbasynyń bıylǵy Joldaýynda qazaqstandyqtardyń turmys jaǵdaıyn jaqsartý máselesine erekshe kóńil bólindi. Osy tapsyrmalardy oryndaý maqsatynda Atyraý oblysy turǵyn úı qurylysyn qarqyndy túrde júrgizýde. Oblysta 44 kópqabatty turǵyn úı qurylysymen qatar, 19 kommertsııalyq uıym úı salyp jatyr. Sonymen qatar, «Nurly jer» baǵdarlamasy aıasynda Elbasy tapsyrmasyna sáıkes bir tıpti jer úılerdi salý boıynsha 400 jer ýchaskesi bólinip, 60, 120, 200 sharshy metr bolatyn 3 tıpti 60 úı turǵyzylýda. Qosymsha 440 jer ýchaskesin bólip, úı salý úshin JSQ jasaqtalyp jatyr. Oblystaǵy turǵyn qurylysy óz qarqynynan taımaıdy. Atyraýlyqtar da «Nurly jer», «7-20-25» baǵdarlamalary arqyly turǵyn úıge qol jetkizý úshin baǵdarlamanyń tıimdi tetikterin taýyp, belsendilik tanytýda»,-dedi oblys ákimi.