Nurlan Noǵaev arendalyq úılerdi jekeshelendirýdi talap etken áıeldermen kezdesti

AQTAÝ. QazAqparat – Mańǵystaý oblysynyń ákimi Nurlan Noǵaev Aqtaýdan turǵyn úı qorynan jaldamaly baspana alǵan Jańaózen qalasynyń turǵyndary - bir top áıelmen, sondaı-aq Aqtaý qalasynyń kópbalaly analarymen kezdesti, dep habarlaıdy QazAqparat tilshisi.

Óńir ákimi baspasóz qyzmetiniń málimetinshe, ákimdikke kelgen analar Jańaózen qalasynan Aqtaýǵa qonystandyrý baǵdarlamasy aıasynda 2019-2022 jyldary aralyǵynda jalǵa berilgen páterlerin jekeshelendirip berýdi talap etken. Sondaı-aq páterdi jalǵa alý jáne kommýnaldyq qyzmetter úshin tólenetin tólem aqysyn alyp tastaý týraly talap qoıǵan.

Mańǵystaý oblysynyń ákimi Nurlan Noǵaev qoldanystaǵy zańnamaǵa sáıkes jalǵa beriletin turǵyn úı jekeshelendirýge jatpaıtynyn túsindirgen.

«Aqtaý qalasynda arendaǵa berilgen páterlerdiń jalǵa alý merzimine shekteý qoıylmaıdy. Eger kelisimshartta tirkelgen adam qaıtys bolǵan jaǵdaıda jalǵa alý kelisimsharty qalǵan otbasy múshelerine uzartylyp beriledi.

Qoldanystaǵy «Turǵyn úı qatynastary týraly» QR Zańy boıynsha sizder turatyn páterler kommýnaldyq turǵyn úı qorynan satyp alý quqyǵynsyz beriledi. Jalǵa beriletin turǵyn úı jekeshelendirýge jatpaıdy. Kommýnaldyq qyzmetterge qatysty, eger sizdiń tabysyńyz tólemdi tolyq óteýge múmkin bolmasa, onda «Turǵyn úı qatynastary» týraly Zańǵa sáıkes qajetti qujattar jınap, turǵyn úı kómegin ala alasyz», - dedi Nurlan Noǵaev.

Baspanany jaldaý aqysy úıdiń sharshy metrine baılanysty 8-den 12 myń teńgege deıin aýytqıdy.

«Kezdesýge oblystyq máslıhat depýtattary da qatysyp, jınalǵandardy komıssııa jumysyn jalǵastyrýǵa shaqyrdy. Máslıhattyń birqatar depýtaty analar kótergen máselelerdi qaraý úshin Parlamentke hat joldady. Kezdesý qorytyndysy boıynsha komıssııa jumysyn jalǵastyrý týraly sheshim qabyldandy», - dep atap ótedi oblys ákimdiginiń baspasóz qyzmetinen.