Nurlan Noǵaev aqtaýlyqtarmen kezdesti
Mańǵystaý oblysynyń ákimi Nurlan Noǵaev suıytylǵan munaı gazynyń baǵasyn tómendetýdi talap etip, kóshege shyqqan Aqtaý qalasynyń turǵyndarymen kezdesti. Bul týraly Mańǵystaý oblysy ákiminiń baspasóz qyzmeti málimet taratty.
«Nurlan Noǵaev jınalǵandarǵa Memleket basshysy Qasym-Jomart Toqaevtyń tapsyrmasy boıynsha suıytylǵan munaı gazynyń baǵasyn tómendetýge qatysty Úkimet qabyldaǵan sharalardy túsindirdi. Oblystyń janarmaı stansalarynyń ıeleri bıznestiń áleýmettik jaýapkershiligi aıasynda bastama kóterip, gaz qunyn 120 teńgeden 85-90 teńgege deıin tómendetý týraly sheshim qabyldady», - dep jazylǵan ákimdik taratqan aqparatta.
El aldyndaǵy sózinde Nurlan Noǵaev Básekelestikti qorǵaý jáne damytý agenttigi janarmaı stansasy ıeleriniń baǵa boıynsha sóz yna qatysty tergeýdi bastaǵanyn aıtqan. Ákim aqtaýlyqtardy da qoǵamdyq tártipti saqtap, halyqtyń ómiri men densaýlyǵyna qaýip tónýine jol bermeýge shaqyrdy.
Kezdesýge Úkimettiń tapsyrmasy boıynsha qurylǵan komıssııa quramyna kiretin Energetıka mınıstrligi men básekelestikti qorǵaý jáne damytý agenttiginiń ókilderi qatysty.
Aıta keteıik, jyl basynda suıytylǵan gaz óndirýshiler munaı ónimderin elektrondy saýda arqyly satýǵa kóshti. Elektrondy saýdaǵa kóshý suranys pen usynys negizinde suıytylǵan munaı gazynyń baǵasyn teńdestirýge jáne jańa óndiris oryndaryn qurýǵa ınvestıtsııalar tartýǵa da múmkindik beredi.
Buǵan deıin Mańǵystaý oblysynyń ákimdigi suıytylǵan gaz baǵasynyń qymbattaýy týraly pikir bildirdi jáne jıi qoıylatyn suraqtarǵa jaýap berdi.
Memleket basshysy Qasym-Jomart Toqaev Twitter-degi suıytylǵan gaz baǵasynan bastalǵan paraqshasynda Jańaózendegi jaǵdaıǵa qatysty jazba jarııalaǵan bolatyn.
Al QR Premer-Mınıstriniń resmı saıty Mańǵystaý oblysyndaǵy janarmaı stansalarynyń ıeleri suıytylǵan munaı gazynyń qunyn lıtrine 120 teńgeden 85-90 teńgege deıin tómendetý týraly sheshim qabyldaǵanyn jazdy.