Nurlan Másimov bıýdjet qarajatyn tıimsiz paıdalanǵany úshin aıyppul tóleıtin boldy

ASTANA. QazAqparat – Pavlodar qalalyq ákimshilik quqyqbuzýshylyq jónindegi mamandandyrylǵan sot Nurlan Másimovtyń isin qarady, dep habarlaıdy QazAqparat.

Otyrysta Pavlodar oblysy polıtsııa departamentiniń burynǵy basshysyna qatysty eki is qaraldy.

Sot departamenttiń 2021 jyly 18 qyzmettik jylqyǵa jem satyp alýǵa 60,9 mln teńge bólgenin anyqtady. Alaıda normalardy buzyp, 10,7 mln teńge artyq josparlaǵan. 2022 jyly jemge 13,4 mln teńge bólingen, biraq normadan tys 8,5 mln teńge qosylǵan.

Sot tıimsiz josparlaý bıýdjet aqshasyn tıimsiz paıdalanýǵa ákep soqty dep esepteıdi.

«Oblystyq polıtsııa departamentiniń burynǵy basshysynyń kinási ákimshilik quqyqbuzýshylyq týraly hattamalar arqyly, aýdıtorlyq esepter, tekserý komıssııasynyń materıaldary, aıǵaqtar jáne sot zerttegen basqa da materıaldar arqyly dáleldenedi. Sot QR ÁQBtK 234-1-baby boıynsha aıyptalýshyǵa ár is boıynsha 214,4 myń teńge kóleminde aıyppul taǵaıyndady», - dep habarlady sottyń baspasóz qyzmeti.

Eske salsaq, 2 aqpanda Nurlan Másimovtiń isi Pavlodar mamandandyrylǵan qylmystyq sotyna qaıtaryldy.

Byltyr 17 qańtarda Pavlodar oblysy polıtsııa departamentiniń basshysy Nurlan Másimov qyzmetinen bosatylǵan edi.

Sol jyly maýsymda Pavlodar oblystyq Polıtsııa departamentiniń burynǵy bastyǵy Nurlan Másimovke izdeý jarııalanǵan bolatyn. Oǵan asa aýyr sybaılas jemqorlyq qylmys jasady degen aıyp taǵyldy.

Keıin izdeý jarııalanǵan Nurlan Másimov týraly aqparat bergen adamǵa 12 mln teńgege deıin syıaqy beriletini habarlandy.

2022 jyly 13 shilde de QR Ultyq qaýipsizdik komıtetiniń ókilderi Nurlan Másimovti Reseımen shekarada ustady.