Nurlan Ermekbaev Polshanyń Ulttyq qaýipsizdik bıýrosynyń dırektorymen kezdesti

ASTANA. QazAqparat - 19 maýsymda túrli memlekettik organdardyń basshylaryn jáne isker toptardyń ókilderin qamtıtyn resmı Polsha delegatsııasy Astanaǵa keldi, dep habarlaıdy QazAqparat QR Aqparat jáne kommýnıkatsııalar mınıstrliginń baspasóz qyzmetine silteme jasap.

Baspasóz málimetterine qaraǵanda, atalmysh sapar 2018 jyldyń qańtarynda Nıý-Iorkte BUU Qaýipsizdik Keńesiniń brıfıngi barysynda Qazaqstan Prezıdenti Nursultan Nazarbaev pen Polsha Respýblıkasynyń Prezıdenti Andjeı Dýda qol jetkizgen kelisimderdi damytý aıasynda uıymdastyrylyp otyr.

21 maýsymǵa deıin ótetin sapar sheńberinde Ekonomıkalyq yntymaqtastyq boıynsha úkimetaralyq komıssııanyń otyrysy, Qazaqstan-Polsha bıznes-forýmy ótti. Polsha delegatsııasy osy kúnderi Astanada ótip jatqan Dúnıejúzilik taý-ken kongresine qatysyp jatyr.

Qaýipsizdik salasynda da jemisti dıalog boldy. Qazaqstan Respýblıkasy Prezıdentiniń kómekshisi - Qaýipsizdik Keńesiniń Hatshysy Nurlan Ermekbaevtyń Polshanyń Ulttyq qaýipsizdik bıýrosynyń Dırektory Pavel Solohpen kezdesýi barysynda keń aýqymdy máseleler talqylandy.

Taraptar jahandyq jáne aımaqtyq qaýipsizdiktiń ózekti aspektileri, aǵymdaǵy táýekelder, túrli «shıelenis núktelerindegi» jaǵdaıdyń damýy boıynsha pikir almasty.

Kelissózder barysynda N.Ermekbaev eki eldiń BUU Qaýipsizdik Keńesiniń turaqty emes músheleri retinde belsendi yntymaqtastyǵyn atap ótti. Bizdiń elimizdiń aımaqtyq qaýipsizdik qurylymdarynyń qyzmetine, BUU bitimgershilik mıssııalaryna qatysýǵa kózqarastary belgilendi.

P.Soloh Qazaqstan Respýblıkasynyń BUU Qaýipsizdik Keńesinde belsendi tóraǵalyǵyn jáne Memleket basshysynyń jahandyq qaýipsizdik salasyndaǵy beıbitshilikti qoldaý jónindegi bastamalaryn joǵary baǵalap, Qazaqstannyń búkil Ortalyq Azııa aımaǵynyń múddesin qorǵaıtynyn atap ótti.

Taraptar ekstremızmge jáne terrorızmge qarsy turýdyń birlesken sharalaryn, ekologııalyq qaýipsizdikti qamtamasyz etý máseleleri jónindegi yntymaqtastyqty keńeıtýdiń bolashaǵyn, sondaı-aq Eýropa Odaǵy men Ortalyq Azııadaǵy jaǵdaılardy egjeı-tegjeıli talqylady.