Nurlan Baıbazarov ınvestıtsııalardy yntalandyrý sharalaryn atady
«Investıtsııalardy odan ári yntalandyrý úshin mynalar usynylady. Birinshi, Biryńǵaı úılestirýshi retinde Investıtsııalyq shtab aıqyndalǵan jobalardy súıemeldeý jáne el ekonomıkasyna ınvestıtsııalar tartý jónindegi ekojúıeni jaqsartý maqsatynda keshendi sharalar ázirlendi. Fast Track nemese «jasyl dáliz» ınvestıtsııalyq jobalaryn qoldaý júıesi engiziledi. Onyń artyqshylyǵy ınvestordyń barlyq qajetti rásimderden jedel jáne jeńil ótýi bolady. Óńirler men ekonomıka salalary bólinisinde qalyptasqan ınvestıtsııalyq jobalar pýlynyń is júzinde iske asyrylýyn qadaǵalaýǵa múmkindik beretin Ulttyq ınvestıtsııalyq platformany tolyqqandy iske qosý qajet. Budan basqa, salalyq jáne óńirlik erekshelikterdi eskere otyryp, ınvestıtsııalar tartýǵa memlekettik organdardan «tapsyrystardy» qalyptastyrý boıynsha júıeli jumys qurylady», - dedi Nurlan Baıbazarov.
Mınıstr ekinshiden, ınvestıtsııalardy tartý úshin daıyn ınfraqurylymnyń qoljetimdiligin qamtamasyz etý óte mańyzdy ekendigin aıtty.
«Eldiń ınfraqurylymdyq qańqasyn qalyptastyrý maqsatynda 2029 jylǵa deıingi Ulttyq ınfraqurylymdyq jospar ázirlenýde. Infraqurylymdy júrgizý protsesin jedeldetý úshin ınvestorlarǵa muny óz betinshe jasaýǵa múmkindik berý máselesi pysyqtalýda. Investıtsııalardy tartýdyń tutas ekojúıesin qalyptastyrý maqsatynda keshendi sharalar ázirlenetin bolady. Óndiristik obektilerdi salý kezinde ınvestorlardyń shyǵyndaryn azaıtý maqsatynda qurylys boıynsha halyqaralyq standarttardy qoldaný qarastyrylýda. Ulttyq standarttarǵa beıimdelý qajettiliginiń bolmaýy jobalardy iske asyrý ýaqytyn 1,5-2 esege qysqartýǵa jáne shyǵystardy jobalaý jáne qurylys satysynda 20-30 paıyzǵa tómendetýge múmkindik beredi», - dedi ol.
Nurlan Baıbazarov úshinshiden, jańa Salyq kodeksi aıasynda salyq tóleýshige baǵdarlanǵan ákimshilendirýdiń servıstik modeli engiziletinin atap ótti. Ol sondaı-aq salyq tóleýshige tirkelýden bastap esepten shyǵarylýǵa deıin fıskaldyq kómek kórsetiletinin, qaryzdy óndirip alý kezinde shottardy buǵatqa qoıý tetigi qaıta qaralatynyn jetkizdi.
Onyń atap ótýinshe, salyq eseptiligi 30 paıyzǵa, salyq tólemderi 20 paıyzǵa qysqarady. Yntalandyrýshy jáne tıimdi jeńildikter saqtalady. Mysaly, taýarlardyń tizbesin ońtaılandyryp, esepke jatqyzý ádisimen ımportqa QQS tóleý tártibi qalady Sonymen birge óńdeý ónerkásibindegi jańa jobalar úshin 3 jylǵa jeńildikter beriledi.
«Salyqtyq jeńildikter berý rásimderin ońtaılandyrý úshin jańa Salyq kodeksi aıasynda ınvestıtsııalar kólemine, óndiristik protsesterdiń kúrdeliligine jáne túpkilikti ónimderdiń ózindik óndirisin damytý úshin mańyzy bar ózge de faktorlarǵa baılanysty saralanǵan tásildi eskere otyryp, jeńildikterdiń «bir paketin» berý jolymen usynylatyn preferentsııalardy birizdendirý qaralady. Osylaısha qoldanystaǵy yntalandyrýdy saqtaı otyryp, bıznesti qoldaýdyń jańa sharalary qabyldanady», - dedi mınıstr.