Nurlan Baıbazarov el ekonomıkasynyń aldaǵy ósimine boljam jasady
«Sizderdiń qaraýlaryńyzǵa Eldiń 2025-2029 jyldarǵa arnalǵan áleýmettik-ekonomıkalyq damý boljamynyń jobasy jáne «Qazaqstan Respýblıkasynyń Ulttyq qorynan 2025-2027 jyldarǵa arnalǵan kepildendirilgen transfert týraly» Zańynyń jobasy engizilip otyr. Boljam halyqaralyq uıymdarynyń álemdik ekonomıkanyń ósýi boıynsha kútýlerin, syrtqy taýar naryqtardaǵy konıýnktýrany eskere otyryp qalyptastyryldy. Halyqaralyq valıýta qorynyń boljamyna sáıkes álemdik ekonomıka 2025 jyly 3,3 paıyz deńgeıinde ósetin bolady. Munaıdyń álemdik baǵasy boıynsha konsensýs-boljamy 2025 jyly barreline 78 AQSh dollaryn quraıdy», - dedi mınıstr.
Onyń atap ótýinshe, syrtqy parametrlerdiń ózgerýine baılanysty damýdyń bazalyq, optımıstik jáne pessımıstik stsenarııi qalyptastyrylǵan.
«Bazalyq stsenarıı kezinde munaıdyń ortasha baǵasy barreline 75 AQSh dollary deńgeıinde usynylady. Boljam boıynsha 2025 jyly jalpy ishki ónimniń naqty ósimi 5,6 paıyzdy, 5 jyl ishinde jalpy ishki ónimniń ortasha jyldyq ósýi 5,4 paıyz bolady. Nomınaldy jalpy ishki ónim 2025 jyly 150,8 trln teńgeden 2029 jyly 234,2 trln teńgege nemese 498,4 mlrd AQSh dollaryna deıin ósedi. Bul Memleket basshysy ekonomıka kólemin eki ese ulǵaıtý jónindegi tapsyrmasynyń oryndalýyn qamtamasyz etedi», - dedi ol.
Nurlan Baıbazarovtyń dereginshe, ekonomıkanyń barlyq salasynda ósý josparlanǵan. Óńdeý ónerkásibiniń ósimi 2025 jylǵy 5,4 paıyzdan 2029 jyly 6,6 paıyzǵa deıin ósedi dep boljanyp otyr. Taý-ken ónerkásibindegi ortasha jyldyq ósim 2,9 paıyz. Munaı óndirý kólemi 2025 jyly 97,2 mln tonnadan 2029 jyly 104,8 mln tonnaǵa deıin ósedi. Aýyl sharýashylyǵynda ortasha jyldyq ósim - 5,3, qurylysta – 9,3, kólik qyzmetterinde – 8,2 jáne saýdada 7,1 paıyz bolady.
«Boljam boıynsha taýar eksporty 2025 jyly 82,3 mlrd AQSh dollarynan 2029 jyly 90,0 mlrd AQSh dollaryna deıin ósedi. Import 61,3 mlrd AQSh dollarynan 67,5 mlrd AQSh dollaryna deıin ósedi. Saýda balansynyń oń saldosy ortasha eseppen 22,7 mlrd AQSh dollaryny quraıdy. Inflıatsııa deńgeıi 2025 jyly 5,5-7,5 paıyz, 2026 jyly 5-6 paıyz deńgeıinde aıqyndaldy, keıinnen 2027–2029 jyldary 5 paıyzǵa deıin tómendeıdi», - dedi mınıstr.