Nurlan Atyǵaev Almaty TJD bastyǵy qyzmetine taǵaıyndaldy

<p>Tótenshe jaǵdaılar mınıstriniń buıryǵymen Almaty qalasy Tótenshe jaǵdaılar departamentiniń bastyǵy bolyp polkovnık Nurlan Atyǵaev taǵaıyndaldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Jańa bastyqty departamentiń jeke quramyna QR Tótenshe jaǵdaılar vıtse-mınıstri general-maıor Erlan Nurpeıisov tanystyrdy.

Nurlan Atyǵaev 1978 jyly Kókshetaý oblysynda dúnıege kelgen. Qazaqstan Respýblıkasy Tótenshe jaǵdaılar agenttiginiń Kókshetaý tehnıkalyq ınstıtýtyn bitirgen.

Eńbek jolyn Soltústik Qazaqstan oblysy Memlekettik órtke qarsy qyzmetiniń Aıyrtaý aýdany № 7 órt sóndirý bóliminiń ınspektory bolyp bastady. Ár jyldary Soltústik Qazaqstan oblysynyń Tótenshe jaǵdaılar departamenti Taıynsha aýdany Tótenshe jaǵdaılar bóliminiń bastyǵy, memlekettik órt baqylaý basqarmasynyń bastyǵy, departament bastyǵynyń orynbasary laýazymynda qyzmet atqardy.

2020 jyldyń jeltoqsan aıynan 2023 jylǵy qazan aıyna deıingi aralyqta Aqmola oblysy Tótenshe jaǵdaılar departamenti bastyǵynyń orynbasary qyzmetin atqardy.

Vıtse-mınıstr TJD qyzmetin jetildirý, atap aıtqanda jylytý maýsymynda aldyn alý sharalaryn, qysqy kezeńdegi is-sharalardy kúsheıtý, túrli tótenshe jaǵdaılar sanyn azaıtý, ásirese halyq arasynda qaýipsizdik mádenıetin nasıhattaýdy kúsheıtý boıynsha mindetter qoıdy.

Erlan Nurpeıisov jeke quram arasynda zańdylyqty, tártipti saqtaýdy, sybaılas jemqorlyqqa qarsy is-qımyldy qamtamasyz etý boıynsha uıymdastyrýshylyq jáne aldyn alý sharalaryn múltiksiz oryndaý kerektigin atap ótti.

Foto: QR TJM baspasóz qyzmeti

Qorytyndylaı kele, vıtse-mınıstr ujymǵa qoıylǵan barlyq mindetterdi sheshýde tabysty jumys tiledi.