Nurlan Álimjanov: Elbasy – álemdik saıasatker, túrki áleminiń abyzy

NUR-SULTAN. QazAqparat – Álem elderiniń kóshbasshylary Elbasy jaıynda tek jaqsy pikir aıtyp jatyr. Bul týraly Aqparat jáne qoǵamdyq damý mınıstrliginiń uıymdastyrýymen onlaın ótip jatqan halyqaralyq jıynda Májilis depýtaty Nurlan Álimjanov málim etti, dep habarlaıdy QazAqparat tilshisi.

«Egemendi el bolyp, eńsemizdi kótergeli 30 jyldyń kólemi boldy. Az ǵana ýaqyt ishinde álem moıyndaǵan keregesi keń, ózge elmen terezesi teń memleketke aınaldyq. Zamanymyz tynysh, elimiz aman, qaryshtap damyp keledi. Bunyń bir ǵana aıǵaǵy retinde osy mańyzdy halyqaralyq sharany aıtýǵa bolady», - dedi N. Álimjanov «QR Tuńǵysh Prezıdenti: jasampazdyq pen údemeli damýdyń 30 jyly» atty halyqaralyq dóńgelek ústel otyrysynda.

Osy oraıda ol búgingi halyqaralyq jıynǵa Elbasymen birge qyzmet etken, Táýelsizdikti nyǵaıtýda birge eńbek etken azamattar qatysyp otyrǵanyn aıtty.

Sonymen qatar N. Álimjanov óner adamy retinde Elbasy rólin somdap, tórt fılmge túskenin eske saldy.

«Fılmniń ózi «Rýhanı jańǵyrýǵa» da kelip otyr. Óıtkeni, «Rýhanı jańǵyrýdy» qarap, Elbasynyń úlken saıasatyn, eńbegin kórip otyrmyz. Qaı jerge barsaq ta, Tuǵysh Prezıdenttiń aty atalady. Elbasy – ol álem moıyndaǵan saıasatker, búkil túrki áleminiń abyzy. Álem elderine barǵan kezde Elbasyny kórgen árbir adam tek qana jaqsy pikirlerin aıtyp jatqanyn baıqadyq», - dedi Nurlan Álimjanov.