Nurqanat Ájiqanov Olımpıadanyń jartylaı fınalyna shyǵa almady

TOKIO. QazAqparat - Tokıo Olımpıadasynda karateden erler arasynda 75 kelige deıingi salmaqta irikteý kezeńi aıaqtaldy. Ókinishke qaraı, qazaqstandyq Nurqanat Ájiqanov óz tobynda jartylaı fınalǵa shyǵa almady, dep habarlaıdy QazAqparat Olympic.kz saıtyna silteme jasap.

Nurqanat óz tobynda Avstralııa, Italııa sportshylaryn jeńip, Germanııa jáne Ázerbaıjan karateshilerine ese jiberdi.

Nátıjesinde, óz tobynda tórtinshi oryn alyp, jartylaı fınalǵa óte alǵan joq.

Nurqanat Ájiqanov synǵa túsken V tobynda ázerbaıjandyq Rafael Agaev pen ıtalııalyq Lýıdjı Býsa jartylaı fınalǵa joldama aldy.

Aıta keteıik, bul, 20 jastaǵy qazaqstandyq sportshy úshin jaman nátıje emes. Ol óz tobynda eki dúrkin álem chempıony Lýıdjı Býsany utyp, álemge áıgili Rafael Agaevtan bir upaı aıyrmasymen ǵana jeńildi.

FOTO: Vladıslav Semenov, Qazaqstan UOK