Nýrı Bılge Djeılan: Festıval fılmderi kórermendi kınonyń jańa álemine jeteleıdi

<p>ALMATY. KAZINFORM &ndash; Festıval fılmderi kórermenderdi kınonyń jańa álemine jeteleıdi. Bul týraly &laquo;Eýrazııa&raquo; kınofestıvaliniń qazylar alqasymen ótken baspasóz máslıhatynda halyqaralyq konkýrs tóraǵasy Nýrı Bılge Djeılan aıtty.</p>

Kezdesý barysynda spıkerler festıvaldiń mańyzdylyǵy, baıqaýǵa qatysatyn kartınalardan ne kútetinin jáne zamanaýı kınematograftyń róli týraly oılarymen bólisti.

Qazylar alqasynyń tóraǵasy, áıgili rejısser Nýrı Bılge Djeılan qazirgi kınematografııa jańa kózqarasty qajet etetinin atap ótti.

«Dástúrli kınematograftyń barlyq taqyryptary birtektes. Ár adamnyń ómirindegi tereń mándi ashyp, názik sezimderge jetý úshin jańa tásildi qoldaný qajet. Festıvalde kórsetiletin fılmder sizderdi kınonyń múlde basqa álemine jeteleıdi», – dedi halyqaralyq konkýrs tóraǵasy.

Qazylar alqasynyń múshesi, aktrısa Rano Shodıeva festıvaldiń tereń ári ádemi fılmderden lázzat alýǵa múmkindik beretin erekshe atmosferasyn atap ótti.

«Jaqsy, taza, jańa jáne ádemi kınoǵa tereń boılaǵymyz keledi. Bizde osyndaı múmkindik bar – ol úshin bir apta berildi. Eń úzdik fılmdi tańdaımyz», – dedi ol.

Halyqaralyq baıqaýda usynylǵan fılmder tereń mazmun men mádenı ártúrliligimen erekshelenedi.

Mysaly, «Belgisiz elge» fılmi palestınalyq bosqyndar týraly baıandasa, «Nırvana» fılmi jaryqqa umtylǵan úsh jasyryn jannyń tarıhyn sýretteıdi. Rejısser Artyqpaı Súıindikov batyl tájirıbeler men tereń taqyryptarǵa nazar aýdarý qajettiligin tilge tıek etti.

«Men «Eýrazııa» festıvali qazaqstandyq kórermender men bolashaq rejısserlerge paıdasyn tıgizgenin qalaımyn. Festıval kınematografııalyq tildi izdeýge, tereń taqyryptardy zertteýge jáne adamnyń ishki álemin ashýǵa basymdyq berse eken. Biz ádettegi kınoteatrda kórsete bermeıtin týyndylar osynda usynylýy kerek», - deıdi qyrǵyzstandyq rejısser.

Eske salaıyq, Almatyda «Eýrazııa» halyqaralyq kınofestıvali saltanatty túrde ashyldy https://kaz.inform.kz/news/almatida-euraziya-halikaralik-kinofestival-saltanatti-turde-ashildi-f50336/.
Halyqaralyq «Eýrazııa» kınofestıvali 24-30 qarasha aralyǵynda ótedi. Festıvalge 15-ten astam el qatysyp jatyr.

Aýqymdy sharany QR Mádenıet jáne aqparat mınıstrligi men Sháken Aımanov atyndaǵy «Qazaqfılm» ulttyq kınostýdııasy uıymdastyrǵan.

Aıta keteıik, bıyl konkýrs baǵdarlamasynda úsh qurlyqtan kelgen 12 fılm usynylady.

Konkýrs Bangladesh pen Ońtústik Koreıadan bastap, Avstrııa men Katarǵa deıingi elderdiń týyndylaryn qamtıdy. Eýropa, Azııa jáne Taıaý Shyǵystan kelgen shyǵarmashylyq toptar ámbebap taqyryptar men jergilikti kontekstti biriktiretin jumystardy usynbaq.

Kınofestıvaldiń tolyq baǵdarlamasymen silteme arqyly tanysa alasyz.