Nurhan Jalıev: Shettegi qazaqqa qamqor bolý - Qazaqstannyń «ákelik» mindeti

NUR-SULTAN. QazAqparat – «Otandastar Qory» kommertsııalyq emes aktsıonerlik qoǵamy Aqparattyq taldaý departamentiniń dırektory Nurhan Jalıev Aýǵanstandaǵy etnıkalyq qazaqtardy elge ákelý máselesi týraly pikir bildirdi, dep habarlaıdy QazAqparat tilshisi.

«Aýǵanstan qazaqtaryn kóshirýge baılanysty el ishinde túrli pikirler aıtylyp jatyr. Biri jaqtasa, biri qarsy bolýda. Jaqtaýshylarǵa salsańyz, ondaǵy qazaqtyń bárin búginnen qaldyrmaı dereý kóshirip ákelý kerek. Qarsy taraptyń oıynsha, Aýǵanstandaǵy qazaqtar kezinde týǵan jerin tastap, tarıhı otanyn satyp ketkender. Sondyqtan olardy elimizge múldem jolatpaý kerek eken. Árıne, Memleket basshysy ózi tapsyrma berip, qoldaý kórsetip otyrǵanda qıyn jaǵdaıdaǵa qalǵan qandastarǵa qoldaý kórsetý óte oryndy», - deıdi «Otandastar Qorynyń» ókili.

Onyń paıymynsha, negizinen Aýǵanstannyń soltústiktegi provıntsııalarynda shashyraı qonystanǵan etnıkalyq qazaqtardyń bárin Kabýldaǵy Qazaqstan elshiliginiń mańaıyna jınaýdyń ózi úlken másele.

«Olardyń Kabýlǵa deıingi joldaǵy qaýipsizdigin kim qamtamasyz etedi? Sondyqtan, qazirgi tańda Aýǵanstandaǵy Qazaqstan Respýblıkasynyń elshiliginde qurylyp, Elshiniń tóraǵalyǵymen jumys istep jatqan arnaıy komıssııanyń jumysyna sáttilik tileıik. Ol ońaı jumys emes. Ýaqytty, muqııattylyqty, jaýapkershilkti talap etedi. Ultyn anyqtaýda birinshi basymdyq qazaq tiline beriledi. Qazaq tilin bilip turǵan adamǵa suraq azdaý bolary sózsiz. Sosyn, shyǵý tegin, ıaǵnı rýy men jeti atasyn, ata-babalarynyń tarıhyn bilý jaǵyn da eskergeni oryndy», - deıdi sarapshy.

Sondaı-aq, ol Aýǵanstandaǵy qazaqtardyń kóbi ol elge kommýnıstik júıeniń qysymyna kónbeı, ultyn, tilin, bolmysyn saqtap, balalaryn aman alyp qalý jáne ózderi tiri qalý úshin aýyp barǵanyn eske salady.

«Aýǵan qazaqtarynyń basym kópshiligi táýelsizdik jyldarynda Qazaqstanǵa qonys aýdardy. 13 myńnan astam adam kelgen bolatyn. Biraq, bes saýsaq birdeı emes qoı. Jaǵdaıy bolmaı, ártúrli sebeptermen qalyp qoıǵandar bar. Olar kóp emes. Osy oraıda aýǵan qazaqtary da tarıhı taǵdyry ortaq birtutas qazaq ultynyń ajyramas bóligi ekenin umytpaýymyz abzal. Álemniń qaı jerinde bolsa da, árbir qazaqtyń tarıhı otany bar. Tarıhı otanynan kez kelgen qandas baýyrymyz ózine pana jáne qorǵan taba alady. Ol otbasyndaǵy ákeniń mindeti ispettes, otannyń mindeti.

Osyndaıda eldigimizdi, birligimizdi, myqtylyǵymyzdy kórsetpegende qashan jáne kimge kórsetemiz?», - dep túıindedi Nurhan Jalıev.