Nurgúl Qaraǵoıshına: Prokýror úshin birinshi mindet - qazaq tilin bilý

ASTANA. QazAqparat - OKQ-da ótken baspasóz máslıhatynda Bas prokýrordyń keńesshisi Nurgúl Qaraǵoıshına prokýratýraǵa jumysqa ornalasqysy kelgen mamanǵa mindetti túrde memlekettik tildi bilý talaby qoıylatynyn málim etti, dep habarlaıdy «QazAqparat» HAAtilshisi.

«Prokýratýra ózderińiz biletindeı, qalyptasyp qalǵan organ. Prokýratýra organdaryna ishki ister organdarynda tergeý kezinde qaralǵan qujattar kelip túsedi. Sol sebepti, osy kelip túsken qujattardy qaraý kezinde qazaq jáne orys tilinde de isterdi qaraı alatyn prokýrorlar otyr. Bas prokýrordyń ózi eki tilde erkin sóıleı alatyn, sózge sheshen basshy ekenin bilesizder. Qazir talap ózgerdi. Bir tildi biletin mamannan góri tańdaý eki nemese úsh tildi biletin mamanǵa túsedi. Sondyqtan, qazirgideı básekelestik zamanda, árkim jaqsy jerde otyrǵysy keletin ýaqytta nemese ózin kórsetkisi keletin kezde prokýror úshin birinshi kezekte memlekettik tildi bilý mindet», - deıdi Nurgúl Qaraǵoıshına.

Bas prokýrordyń keńesshisiniń aıtýynsha, Qazaqstandaǵy prokýrorlardyń 80 paıyzǵa derligi qazaq tilin meńgerip alǵan.

«Biraq, jumys babyna baılanysty qujattar aınalymy kóbinde orys tilinde júredi. Sebebi, aryz jazýshy óz halqymyz shaǵymyn orys tilinde jazyp alyp keledi. Sondyqtan, ózimiz halyq bolyp, ult bolyp, bastamany qazaq tilinde aıtpasaq, onda jaýap ta sondaı bolady. Sol úshin baılanys eki jaqty bolsyn degim keledi. Sol kezde bizdiń sharýamyz retteler edi», - deıdi ol.

Eske sala ketsek, buǵan deıin Nurgúl Qaraǵoıshına Elbasynyń «Rýhanı jańǵyrý» baǵdarlamasyn júzege asyrý maqsatynda QR Bas prokýratýrasynyń bastamasymen «Rýhanı jańǵyrý - patrıotızm negizi» atty vedomstvoaralyq baıqaý ótetinin habarlaǵan bolatyn. Onyń aıtýynsha, bıylǵy baıqaýǵa 6 memlekettik organ qatysady. Olar - Bas prokýratýra, QR UQQ Shekara qyzmeti, Memlekettik kúzet qyzmeti, Memlekettik qyzmet jáne sybaılas jemqorlyqqa qarsy is-qımyl Agenttigi, QR Qorǵanys mınıstrligi men QR ІІM.