Nurǵısa Dáýeshov: Basty qundylyq - eldegi tynyshtyq

ALMATY. QazAqparat - Qazaqstannyń basty qundylyǵy - tynyshtyq pen beıbitshilik. Osyndaı oıymen Qurmanǵazy atyndaǵy Qazaq memlekettik akademııalyq halyq aspaptar orkestriniń dırektory, Qazaqstannyń eńbek sińirgen qaıratkeri Nurǵısa Dáýeshov bólisti, dep habarlaıdy QazAqparat tilshisi.

Onyń aıtýynsha, jańa prezıdenttiń saılanýy Qazaqstannyń jańa kezeńge ótkenin bildiredi.

«Ekonomıka, táýelsizdiktiń tuǵyrly bolýy - birinshi kezekte Nursultan Nazarbaevtyń eńbegi, ony baǵalaýymyz kerek. Ol kisiniń eńbeginiń arqasynda álem tanıtyn dárejege jettik. Shetelde júrgen qazaqtar elge oraldy. Munyń barlyǵy - eldegi tynyshtyq pen beıbitshiliktiń arqasy dep túsiný kerek. Búgingi bolyp jatqan ahýal bolashaq urpaǵymyzǵa úlken sabaq jáne úmit», - dep atap ótti N.Dáýeshov.

Mádenıet salasynyń ókili jańa Prezıdent Qasym-Jomart Toqaevtyń saıasatyn qoldaıtynyn jetkizdi.

«Toqaev ulyqtaý saltanatynda áleýmettik jaǵdaıǵa erekshe mán beretinin aıtty. Onyń baǵdarlamasynyń oryndalatynyna tolyq senemiz. Sonymen qatar, urpaq saýlyǵy men bilim kókjıegi úshin ter tógetin muǵalimder men dárigerlerdiń jaǵdaıyn jaqsartý týraly aıtyldy. Qasym-Jomart Kemelulyn tolyq qoldaı otyryp, Qazaqstan azamaty retinde óz elimizdiń órkendeýi úshin shyn nıetimmen jumys isteýge daıynmyn», - deıdi Nurǵısa Dáýeshov.

Aıta ketsek, elordada jańadan saılanǵan QR Prezıdenti Qasym-Jomart Toqaevty ulyqtaý rásimi ótti. Q. Toqaevty ulyqtaý rásimine Úkimet músheleri, Parlament depýtattary, Konstıtýtsııalyq Keńes músheleri, Joǵarǵy Sot sýdıalary, Qazaqstanda tirkelgen dıplomatııalyq korpýs ókilderi jáne basqa da shaqyrylǵan qonaqtar qatysty.

Táýelsizdik saraıynda Qasym-Jomart Toqaev Qazaqstan halqyna ant berdi. Ant bergen sátten bastap jańadan saılanǵan Prezıdent resmı qyzmetine kirisken bolyp sanalady.