Nurbek Oralbaı: Olımpıadaǵa altyn medal úshin keldik

<p>PARIJ. KAZINFORM &mdash; Frantsııa astanasy Parıj qalasynda ótip jatqan Olımpıada oıyndarynda jartylaı fınalǵa joldama alǵan boksshy Nurbek Oralbaı jekpe-jekten keıingi áserimen bólisti.</p>

«Búgingi jekpe-jegim bári oıdaǵydaı ótti. Negizi osynda altyn medal úshin kelgenbiz. Basqa balalardyń barlyǵy meniń oıymsha qarsylastarynan emes, tóreshilerdiń qateliginen utylyp jatyr dep esepteımin. Biraq, biz buǵan bola bosap qalmaımyz, kerisinshe bizdi jigerlendire túsedi. Kelesi qarsylasymnyń kim ekeni belgili. Onymen birinshi ret sharshy alańda jolyqqaly otyrmyn. Endi kelesi aıqasyma daıyndalamyn», - dedi boksshy.

Sondaı-aq, keshe óziniń egizi Aıbek týraly da óz oıyn aıta ketti.

«Aıbek 15 jylyn osy sportqa arnady. Jarys bolǵannan keıin jeńis te, jeńilis te qatar júredi ǵoı. Er azamat qoı, ne bolsa da kóteredi ǵoı. Ókinishke qaraı utylyp qaldy», - dedi Nurbek Oralbaı.

80 keli salmaqta el namysyn qorǵap jatqan Nurbek Oralbaı búgin qazaq boksshylary arasynda birinshi bolyp jartylaı fınalǵa shyqty.

Endi Astana ýaqytymen 23:30-da áıelder arasynda Karına Ibragımova shırek fınalǵa shyǵý úshin pýerto-rıkolyq Ashleın Motta Lozadamen bokstasady. Sonymen qatar, 3 tamyzǵa aýǵan túni, 00:20-da erler arasynda qazaqstandyq Sáken Bıbosynov pen ózbek Hasanboı Dýsmatov arasyndaǵy shırek fınal jekpe-jegi ótedi.

Bıbosynov pen Dýsmatov byltyr Azııa oıyndarynyń ekinshi aınalymynda bokstasyp, Dýsmatov jeńiske jetken edi. Dýsmatov – Rıo Olımpıadasynyń chempıony, al Bıbosynov – Tokıo Olımpıadasynyń qola júldegeri. 

Búgin qazaqstandyq sportshylar sporttyń 8 túrinen – stendtik atý, akademııalyq esý, dzıýdo, jeńil atletıka, júzý, semserlesý, boks jáne batýt gımnastıkasynan baq synap jatyr.