«Nurbank» valıýtalyq ıpotekalyq qaryzdardy qaıta qarjylandyrýǵa ótinishter qabyldaı bastady
«Nurbank» AQ valıýtalyq ıpotekalyq qaryzdardy qaıta qarjylandyrý maqsatynda «Qazaqstannyń ornyqtylyq qory» AQ-pen salym shartyn jasasty. Soǵan baılanysty 2019 jylǵy 4 maýsymnan bastap bank qaryz alýshylardyń valıýtalyq ıpotekalyq qaryzdaryn qaıta qarjylandyrýǵa ótinishter qabyldaý protsesin bastady. Osyǵan oraı «Nurbank» AQ salymshylary osy bankke tıisti ótinishin bere alady», - delingen Ulttyq bank taratqan aqparatta.
Esterińizge sala ketsek, 2018 jylǵy 10 qańtarda Qazaqstan Respýblıkasynyń Tuńǵysh Prezıdenti - Elbasy óziniń Qazaqstan halqyna Joldaýynda Ulttyq Bankke halyqtyń 2016 jylǵy 1 qańtarǵa deıin berilgen valıýtalyq ıpotekalyq qaryzdary boıynsha máseleni túpkilikti sheshýdi tapsyrǵan bolatyn. Osy tapsyrmany oryndaý úshin Ulttyq bank basqarmasy 2018 jylǵy 27 naýryzda Ipotekalyq turǵyn úı qaryzdaryn qaıta qarjylandyrý baǵdarlamasyn jańa redaktsııada bekitti. Atalǵan baǵdarlama jeke tulǵalardyń 2016 jylǵy 1 qańtarǵa deıin berilgen valıýtalyq ıpotekalyq qaryzdaryn qaıta qarjylandyrýdy kózdeıdi. Qaryzdar Ulttyq banktiń 2015 jylǵy 18 tamyzdaǵy baǵamymen (bir AQSh dollary úshin 188,35 teńge) teńgemen qaıta qarjylandyrylýy tıis.
«Tolyǵyraq aqparat alý úshin salymshylar «Nurbank» AQ-qa 2552 (uıaly telefonnan habarlasý tegin) ne +7 727 259 97 10 nómirleri boıynsha ótinish jasaı alady. Baǵdarlama boıynsha suraqtar týyndaǵan jaǵdaıda Qazaqstan Ulttyq bankine +7 727 261 92 45, +7 700 483 21 25 nómirleri boıynsha ótinish jasaýlaryńyzdy suraımyz. Tutynýshylardyń quqyqtaryn qorǵaý máseleleri boıynsha qaryz alýshylardyń aýmaqtyq tıistiligine sáıkes Qazaqstan Ulttyq bankiniń tıisti fılıaldaryna jáne bankterge ótinish jasaýlaryna bolady», - dep atap ótedi Ulttyq bankten.