Nuráli Álıev Qazaqstanda qar barysyn saqtap qalý jobasyn bastady
Almaty qalasynda «Snow Leopard Foundation» halyqaralyq jeke qorynyń resmı tusaýy kesildi. Atalmysh qordyń negizin qalaýshy - qazaqstandyq bıznesmen, metsenat Nuráli Álıev bolyp otyr.
Qordyń resmı túrde ótken ashylýynda qorshaǵan ortany qorǵaý boıynsha halyqaralyq uıymdardyń ókilderi men jetekshi ǵalym-zoologtar, Shvetsııa, AQSh, Qytaı, Reseı, Monako, Birikken Arab Ámirlikteri, Nıderlandy, Makedonııa, Danııa, Frantsııa men Túrkııa elderinen qurmetti meımandar, memlekettik organdardyń ókilderi, qazaqstandyq jáne sheteldik bıznesmender keldi.
Keshke sonymen birge gollıvýdtyq akter Edrıan Broýdı, belgili shved jıhangezi Iohan Nılson, Djek Manyń «Paradise International Foundation» qorynyń vıtse-prezıdenti Van Dechjı, Monako Albert II hanzadasy qorynyń ókili Getsbı Mılıýten qonaq boldy.
Meımandardyń aldynda sóz sóılegen Nuráli Álıev atalmysh qordy qurý týraly burynnan josparlaǵanyn, Qazaqstanda ilbisterdiń taralýyn uzaq jyldarǵa sozýǵa bolarlyq júıe qurýdy oılap júrgenin atap ótti.
«Qar barysy Táýelsiz Qazaqstannyń sımvoly bolyp tabylady. Alaıda shırek ǵasyrdyń ishinde Qazaqstanda bul ańnyń popýlıatsııasy 40 paıyzǵa azaıdy», - dedi ol.
Jańa qor basshysynyń aıtýyna qaraǵanda, «Snow Leopard Foundation» TMD elderi ishinde qar barysyn reıntrodýktsııalaý boıynsha tuńǵysh qor bolyp tabylady.
Anyqtalyp otyrǵanyndaı, biregeı «Kingdom of Snow Leopard» baǵdarlamasy aıasynda Іle-Alataý ulttyq tabıǵı parktiń ishindegi 500 gektarlyq aımaqta qar barysynyń ósirilýi men beıimdelýi ortalyǵynyń qurylysyn júrgizý josparlanǵan. Sonyme birge, atalǵan ortalyqta vızıt-ortalyq pen arnaıy tamashalaý alańy salynady. Ol jerde kelgen meımandar qar barysynyń tirshiligin tamashalaı alady.